Basic Journalism ug Social Media Seminar gipahigayon

Ang tuig 2019 mao ang tuig sa kabatan-onan, busa nahimong prayoridad sa ministriya sa SOCCOM sa parokya sa Our Lady of Miraculous Medal Parish, Indangan ang pagpahigayon og seminar mahitungod sa basic journalism ug social media management niadtong May 5, 2019, Dominggo alas 10:00 sa buntag hangtod alas 2:30 sa hapon.

Kini gisalmutan sa 54 ka mga partisipante nga kasagaran gikan sa sector sa kabatan-onan.

Ang maong aktibidad nahimong mabungahon tungod sa presensya sa mga hanas ug adunay kasinatian nga mga speakers nga sila Fr. Ritsche Gamaya, Julianne Suarez ug si KC.

Abtik ug bibo kaayo ang mga partisipante nga nagbuhat sa mga workshop nga gihatag ni Suarez ilabina iya kining gitudluan og mga tips sa paghigayon sa pagsulat og mga balita.

Ug nahimo usab nga pamalandong o ‘awakening’ alang sa tanan ang input ni KC Corro mahitungod sa responsableng paggamit sa social media.

Ang maong kalihukan naghatag og inspirasyon ug giya sa mga manunulat na mahimo silang epektibo diha sa pagsangyaw sa maayong balita diha sa katawhan.

Ug nagahatag kini og lamdag sa mga kabatan-onan na gihimong ‘haven’ ang social media sa ilang pagpadayag sa ilang kaugalingon.

Mapasalamaton ang OLMMP SOCCOM sa kura paroko nga si Fr. Jesus Samaniego tungod sa iyang suporta, sa mga partisipante sa nagkalain-laing GKK, ug ilabina sa mga staff sa DXGN ug Davao Catholic Herald sa ilang pagpaambit sa ilang oras ug talento. (Marilou A. Luzon | OLMMP Indangan Soccom)