Tinuod Gayud nga Siya Nabanhaw, Paglipay!

Easter Sunday of the Lord’s Resurrection
Acts 10:34a, 37-43 / Ps 118:1-2, 16-17, 22-23 / Col 3:1-4 or 1 Cor 5:6b-8 / John 20:1-9 or Lk 24:13-35

Adunay usa ka magtiayon nga nakasinati sa dakung hagit sa ilang kinabuhi. Bag-o lang nanganak ang asawa, apan ang bana nawad-an sa trabaho. Buot nila nga ipa-adopt ang ilang anak aron mahatagan sa maayong kaugmaon. Apan usa ka adlaw, adunay usa ka batan-ong lalaki nga nakakita kanila og mihalad sa ilang garahe, samtang wala pa silay nakitang kapuy-an. Nasuko ang doctor nga amahan sa binatilyo, ug walay mahimo ang inahan gawas sa pagsunod sa gisulti sa iyang bana. Namugos ang binatilyo nga matabangan ang magtiayon nga nanginahanglan, busa gipadayon niya sila didto sa garahe. Nakit-an karon sa ginikanan sa binatilyo ang kalipay sa ilang anak nga mitabang niining magtiayon. Ang kalipay sa pagtabang nga gibuhat sa binatilyo, nakapahunahuna sa iyang ginikanan, unsa kaanindot ang pagka-matinabangon. Sa kadugayan, sila na mismo ang misugyot nga sila na ang bahala sa pagkaon sa kabus nga magtiayon ug sila na usab ang bahala sa pag-atiman sa ilang bag-ong natawo nga anak. Ang kalipay maka-takod ug mao kana ang kasinatian sa mga apostoles sa diha nga nadunggan nila og nasinati ang pagkabanhaw ni Jesus. Sila nagpadayon sa ilang kalipay sa pag-alagad ug bisan pa gani sa paghatag sa ilang kinabuhi sa ngalan ni Jesus. Si Jesus nabanhaw, ug kini ang timailhan sa tunhay nga gugma sa Dios Amahan kay wala niya pasagdi nga ang kamatayon magmadaugon. Wala niya itugot nga ang iyang Alagad madugta sa lubnganan. Sa iyang pagbanhaw kang Jesus, iya usab gibuhi pag-usab ang iyang mga hiyas, ang iyang mga pulong, ang iyang mga panaad, apil na ang mga baruganan nga iyang gihuptan alang sa mga kabus.

Sa iyang pagkabanhaw, nahatagan kita ug paglaum nga kita usab mabanhaw uban kaniya. Kini nga paglaum maoy puwersa nga magsostiner kanato diha sa mangingit nga kahimtang sa atong kaugalingon, sa atong nasud og sa atong katilingban, mga insosente nangamatay ug gipamatay; grabe nga human ‘rights violation’ nga mga panghitabo sa atong katilingban. Ang kinabuhi nga dala ni Jesus sa iyang pagkabanhaw mao ang kinabuhi nga tunhay uban sa Dios nga walay kamatayon. Sama sa tinun-an nga gimahal ni Jesus, kita mituo nga siya gayud nabanhaw. Tungod niini makabuhat kita ug maayo ngadto sa uban nga malipayon, kay mituo kita nga ang pag-alagad sa Dios usa ka buhat sa kalipay. Himaya sa Dios hangtud sa kahangturan! (Sr. Rica G. Dalaguit, fsp.)