Piniliay giandaman, ECHAMP gipakusgan

Usa ka bulan na lamang, muabot na gayod ang adlaw sa piniliay. Busa dakong pagpangandam na ang gihinmo sa kadaghanan. Aduna nay mga jingle sa nagkadaiyang kandidato, bisan sayo pa sa kabuntagon, ingon man wala’g tuo na usab ang mga posters nga makita sa daplin sa kadalanan.

Ang mga lokal nga simbahan sa Davao, Digos, Tagum ug Mati (DaDiTaMa) pinaagi sa Davao Association of Catholic Schools (DACS) nangandam alang sa piniliay, ilabina sa pagtabang sa mga botante. Busa aduna silay gilunsad nga Election that is Clean, Honest, Accurate, Meaningful and Peaceful kon ECHAMP katambayayong ang nagkadaiyang sektor.

Niadtong Abril 11, 2019 nagkatigom ang mga Coodinators sa ECHAMP sa buhatan sa DACS sa Juna Subdivision, Matina, Davao City. Ang mga mitambong gikan sa Diocese of Tagum, Digos, Mati ug Archdiocese of Davao, lakip na niini ang mga gikan sa nagkadaiyang Catholic Schools, Parish, Vicariates, Parish Disaster Action Response Teams, Diocesan Commission on Social Communications ug ingon man ang gikan sa Commission on Elections Region XI.

Sumala ni Jimmy Lou Dela Vega, Executive Director sa DACS, nga dako gayud ang ilang pagpangandam ilabina nga gikinahanglan ang koordinasyon sa matag usa. Dugang pa anaa na sa 1,000 ang ilang mga volunteers apan ilang gipaningkamotan nga mokabat kini sa kapin 5,000 aron makahimo sa nagkadaiyang gimbuhaton, ilabina sa pagtabang alang sa Poll watchers, Voters assistance, Help Desk, News Gatherers ug Reporters, Prayer warriors ug Mobile Communications Group.

Ang Commission on Elections Region XI malipayon sa paglunsad sa DACS sa ECHAMP aron makatabang sa pagpahigayon sa election.

Sumala ni Atty. Gay Enumerables, Assistant Regional Director sa Comelec Region XI nga ang ECHAMP nahimong makagaan sa ilang gimbuhaton sa piniliay, sama na lamang sa pagbutang sa Help Desk diin aduna nay maka abi-abi sa mga botante diha sa nagkadaiyang mga panginahanglan.

Kining hiniusang lihok sa DaDiTaMa uban sa nagkadaiyang sektor tubag kang Santo Papa Francisco nga nagkanayon: “Ang politikanhong katungdanan ug responsibilidad kanunay naghagit niadtong mga gitawag sa pag-alagad sa ilang nasod nga maningkamot nga panalipdan ang mga molupyo ug mohimog kahimtang sa angayan ug takus nga kaugmaon. Kung gipuy-an uban sa batakang respeto sa kinabuhi, kagawasan ug dungog sa tawo, ang kinabuhing politikanhon mamahimong talagsaong matang sa paghigugma.”