Lenten Recollection isip Pagpangandam sa Semana Santa

Isip pagsalmot sa milabay nga Kwaresma, ang Parokya sa Santiago Apostol sa Bunawan, Davao City nagpahigayon og usa ka Open Lenten Recollection niadtong Abril 8-9, 2019, diin ang mga parokyano, mapahamtong o kabatan-onan man, nagkahigayon sa pagpamalandong ug pagpangumpisal.

Atol sa maong Recollection, giimbitahan si Rev. Fr. Marbendear Morallas, aron pagpasabot sa mga katawhan sa pagsubay balik sa dalan ni Hesukristo aron masinati ang mensahe sa Kwaresma. Tungod niini napamalandungan ang kapasayloan ug makaluwas nga gugma sa atong Ginoong Hesukristo.

Iya usab gibutyag nga, “sa pagsalmot sa panahon sa Kwaresma, hinaot nga makahinumdum kita sa makaluwas nga paghigugma sa atong Ginoo kanatong tanan. Mapasayloon sa isigkaingon, ug mangayo og pasaylo sa atong Diyos. Ang atong Diyos nga mahigugmaon ug mapasayloon.”

Gitapos ang maong recollection sa usa ka pagpamalandong pinaagi sa pagpangumpisal ug pag-ampo. (Sheovy Vistar | SJGAP-Bunawan SoCCom)