Konkretong lihok alang sa pag-atiman sa kinabuhi

Human sa pakisusi ug pagkonsulta sa uban, nahitabo ang paglunsad sa “SAGOP KINABUHI PROGRAM 2 (SKP 2) niadtong Marso 31, 2019 sa St. Joseph the Worker Parish, Sasa diha sa Santos nga Misa nga gisaulog ni Archbishop of Davao, Archbishop Romulo G. Valles. Kini alang sa pagtabang sa mga VSRP nga anaa sa palibot sa maong parokya.

Sa makugihong tinguha sa kura paroko, Rev. Fr. Leonardo A. Dublan, Jr. ug mga suporta gikan sa tulo ka mga Barangay Chairman sama sa Barangay Sasa, Barangay Pampanga ug Barangay Hizon ug mga boluntaryo nga magtutudlo ug mga studyante gikan sa Holy Cross College of Davao ug Holy Cross College of Sasa, Inc. nga makugihon, mabination ug maalagarong mitahan sa ilang kaugalingon, nagkahiusa ug nagtinabangay aron sa pagpahigayon sa maong programa.

Matod pa ni Archbishop Valles, “ang mga VSRP pinalangga sa Ginoo, bisan pa man sa kahuyang sa tawo dawaton gihapon sa Ginoo. Busa kita usab diha sa katilingban ato usab silang dawaton sa tibuok natong kasingkasing ug magtinguha nga makatabang kita kanila.”

Usa kini ka konkretong lihok alang sa pagtabang sa atong mga kaigsuonan nga nalulong sa druga, mao kini ang giatiman sa atong Parish Social Action Ministry (PSAM), ang ministriya sa gugma ug kalooy diha sa Parokya. Gipangulohan kini ni Victor Miclat.

Ug gipadagayday ngadto sa GKK level pinaagi sa mga Pangulo sa Alagad (PSA) alang sa pagtabang sa mga panginahanglan sa katawhan labot sa panglawas, masakiton, edukasyon, training skills, kalinaw, likay kalamidad ug uban pa.

Kini nga SKP 2 program magsugod ang pormasyon o session karong Abril 3, mahitabo ka usa matag semana, hangtod mahuman ang 18 ka sessions. Dala sa panghinaut ug pag-ampo nga kining 35 ka mga tawo gikan sa Barangay Sasa, gi-endosar ni Barangay Chairman Jerry Licarte ug 10 ka mga tawo gikan sa Barangay Pampanga ug 5 ka mga tawo gikan sa Barangay Hizon, maka-angkon og kabag-uhan, kausaban ug maantigong modangop sa panabang sa atong Ginoo. (Amie Desquitado | SJWP SoCCom)