GKK SoCCom Pormasyon ug Panagtigom

Gi-awhag sa Kura Paroko sa St. Mary of the Perpetual Rosary Parish nga padayonon ang mga pormasyon sa matag ministriya sa Parokya niining kasamtangag tuig. Isip tubag niini, gipahigayon ang unang pormasyon nga gihimo karong tuig kauban ang mga nagkalain-laing GKK Social Communications Committee (SoCCom) nga nahisakop sa Parokya niadtong March 31, 2019 diha sa PSK Hall.

Gisugdan kini sa alas nuebe ang takna sa buntag pinaagi sa para-liturgical celebration. Diha sa maong pormasyon gihisgutan ug gipasabot ang topiko mahitungod sa Political Education sanglit haduol na ang pinili-ay karong umaabot nga Mayo 13, 2019. Gi re-echo sa parish formator, Sis. Juanita Rodriguez ang mga modules nga ilang nahisgutan panahon sa ASAC workshop nga gipangulohan ni Fr. Bong Dublan. Gipaambit sa parish formator ang duha ka modules mao ang “The Community of Disciples: workers of renewal, called to social transformation” ug ang “The call of good politics from the message of Pope Francis during the World Day of Peace”. Ang maong input nagpahinumdum kanato kung unsa ang atong kasinatian diha sa personal o politikanhong kinabuhi. Mao kini ang hagit kanatong mga Kristiyanong nangalagad sa simbahan ug atong ipaambit nga sama kang Kristo ang tulo ka misyon nga mao ang Prophetic, Priestly and Kingly. Gitapos ang input pinaagi sa pag-ingon, “Good Politics is a Service of Peace”.

Ang ikaduhang bahin mao ang panagtigom diin ang Parish SoCCom Coordinator, Sis. Hermie Mapute gibalik og pagpahinumdum ang mga duties and responsibilities sa mga GKK SoCCom tungod daghan pa ang dili kaayo nakahibalo ilabina sa mga bag-o. Gipasabot ug gi-review ang mga angay buhaton panahon sa GKK Pre-Fiesta Assembly aron mahan-ay ang tanan.

Ang Kura Paroko sa St. Mary of the Perpetual Rosary Parish, Fr. Diony Tabiliran nigahin sa iyang oras sa maong panagtigom aron sa pagtubag sa mga GKK concerns and issues sa pipila nga nagpadangat niini.

Gihuman ang pormasyon ug panagtigom pinaagi sa hiniusang pag-ampo ug katapusang panalangin ug bendisyon ni Fr. Diony Tabiliran. (Arsenia Barimbao | SMPRP GKK SoCCom)