Dugang tuig sa pagpangalagad giduyogan

Niadtong Marso 31, 2019 (Domingo), nagpahigayon og Advanced Birthday Celebration ang tanang membro ug opisyales sa Parish Pastoral Council sa Parokya sa Santiago Apostol, Barangay Bunawan, Davao City alang sa ilang mahal nga Kura Paroko Rev. Fr. Rolando O. Mandreza, DCD.

Gipahigayon kini bisan ang adlaw’ng natawhan ni padre kay sa Abril 1, 2019 (Lunes) pa tungod kay ang kadaghan sa parishioners kay adunay mga trabaho. Apan, bisan pa man advance ang selebrasyon niini, daghan ang nakigduyog sa maong selebrasyon didtoa sa Garden nila Bing Tan sa Bunawan, Davao City ilabina ang pipila sa pamilya ni padre. Daghan pod kaayo og pagkaon ang giandam alang sa tanang mga bisita ni padre. Kini nagpamatuod nga tinood gayud nga gisuportaan ug gimahal sa tanang parishioners ang among kura paroko. Bisan ang mga higala ni padre ilabina ang mga Alumni sa Crossian Voices sa Holy Cross of Davao College gipangulohan ni Sir Amiel Bacunla, niadto gayud sa maong selebrasyon.

Sa mismong adlaw’ng natawhan ni padre niadtong Abril 1, 2019, gigasahan usab siya sa Ginoo og dugang tuig sa pagpangalagad niya diha sa Ginoo ug katilingban. Nagmisa siya sa alas 6:00 sa buntag ug gitambungan kini sa pipila ka mga parishioners. Sulod sa misa, mapasalamaton si Rev. Fr. Rolando O. Mandreza, DCD sa Ginoo tungod kay ika-49 na niya katuig niining kalibutana.

Human sa maong misa, giharanahan siya sa mga parokyano ug sabay-sabay nangaon gawas sa simbahan. Dako gayud nga pasalamat ang gibutyag sa kura paroko sa mga taong nihatag og higayon aron makaselebrar sa iyang adlaw’ng natawhan. Nagpasalamat usab siya sa tanang mihatag og mensahe ug pag-ampo para sa iyaha. Nalipay pod ug dako ang tanang parishioners sa pag-abot sa mahal nga kura paroko nga si Rev. Fr. Rolando Mandreza sa Santiago Apostol tungod kay usa gayud siya ka gasa nga gihatag sa Ginoo aron molambo ang pagtoo sa matag-parokyano. (An-Jean V. Naraga | SJAP SoCCom)