Buhing Kristiyano mahinungdanon sa pagsaulog sa Semana Santa

Ang partisipasyon sa mga buhing Kristiyano kon mga parokyano usa sa mga rason nga nahimong mahinungdanon ang pagsaulog sa milabay nga Semana Santa, pamahayag sa Kura Paroko sa Santiago Apostol.

Atol sa homiliya sa Kura Paroko sa maong parokya nga si Rev. Fr. Rolando O. Mandreza, DCD niadtong Sabado Santo, siya nagpasalamat og dako sa tanang misalmut ug sa mga buhing Kristiyano nga nagpaluyo sa malampusong pagsaulog sa maong selebrasyon.

“Dili gayud mamahimong mahinungdanon ang Semana Santa kung wala ang tabang, suporta inubanan sa pag-ampo sa tanang parokyano sa Santiago Apostol,” pamahayag ni Fr. Mandreza.

Giduyugan ug aktibong gipartisiparan sa mga parokyano sa parokya sa Santiago Apostol ang nahitabong pagsaulog sa Semana Santa sugod adtong Huwebes Santo hangtod sa Bihilya sa Pagkabanhaw o Sabado Santo.

Dako ang gibuhat nga preparasyon sa tanang mga kabahin sa maong aktibidades aron kini mamahimong mabungahon ug malampuson.

Atol sa maong selebrasyon sa Huwebes Santo, Abril 18, 2019, gipahigayon ang Paghugas sa mga Tiil sa mga Apostoles sa parokya uban sa mga napiling mga apostoles.

“Ang paghugas ni Hesus sa tiil sa mga apostoles nagpakita sa iyang pagkamapaubsanon nga Ginoo ug kini unta nga batasan ang atoang sundugon sa atong tagsa-tagsa ka kinabuhi,” pamahayag sa homiliya ni Fr. Mandreza.

Samtang niadtong Biyernes Santo, Abril 19, 2019, nagpahigayon usab og pagpenitensya ang mga parokya pinaagi sa pagsalmot sa Via Crucis nga nagsugod sa alas 4:00 sa buntag ug nahuman sa alas 9:00 sa buntag.

Ang maong Via Crucis, nagsugod sa nagkadaiyang tulo ka ruta ug nag-abot tanan sa parokya diin didtoa nahimutang ang ikanapulog-upat nga estasyon.

Pagkahuman sa maong aktibidad, nagpahibalo si Rev. Fr. Rolando O. Mandreza, DCD sa mga misalmot nga “mamalandong ug mutan-aw sa 7 Last Words sa telebisyon, musalmot sa Veneration of the Cross pagkahapon ug Prosisyon sa Santo Intiero.”

Dugang pa niini, nahimo pung malampuson ang nahitabong Bihilya sa Pagkabanhaw niadtong Sabado Santo, Abril 20, 2019. Nagsugod ang maong bihilya sa alas 6:00 sa gabii ug nahuman kini alas 10:00 sa gabii.

Gidugukan og mga parokyano ang simbahan ug napuno kini atol sa maong selebrasyon.

“Ang Bihilya sa Pagkabanhaw sa atong Ginoong Jesukristo ang isa sa pinakadako nga piyesta sa tibuok simbahan labi na sa atoa nga magtutuo tungod kay nabanhaw na ang atoang Ginoo,” pagpasabot ni Fr. Mandreza.

Sa katapusan, mahinungdanon gayud ang pagsaulog sa Semana Santa sa Santiago Apostol tungod sa aktibong partisipasyon sa mga parokyano uban sa Kura Paroko. (An-Jean Naraga | SJGAP-Bunawan SoCCom)