Ayaw paghukom

Ikalima nga Domingo sa Kwaresma
Is. 43:16-21 / Sal. 126 / Fil. 3:8-14 / Jn. 8:1-11

“Bisag kinsa kaninyo nga wala makasala maoy paunaha pagbato kaniya.” Kini ang mga pulong nga gisulti ni Hesus sa mga tawo nga midala ngadto kaniya sa babaye nga hisakpan nga nanapaw. Sa balaod nila kaniadto, batuon ang nanapaw, mao nga nagtuo sila nga si Hesus mohukom usab sa babaye nga nanapaw. Apan lahi ang ilang nadungog.

Una sa tanan, buot ni Hesus nga ang atong mga sala dili mahimong higayon nga tugotan na lamang ang sala sa uban. Kondili, nga unta tungod kay kita nakasala, mahimo unta kitang mas maluloy-on sa uban. Sama nga kita huyang ug nanginahanglan sa kaluoy, maningkamot unta kita sa paglikay sa sala ug sa paglikay sa paghukom sa nakasala. Kasilagan ta unta ang sala ug dili ang nakasala.

Ikaduha, gitudlo usab ni Hesus niining higayona ang pagsabot nga dili ang pagkasakop sa sad-an ang dautan kondili ang sala mismo maoy dautan. Tungod ba kay siya nasakpan nga nanapaw, dautan na kaayo siya? Kadtong nakasala nga wala nasakpan, mas dili ba dautan kay kaniya? Alang kang Hesus, daghan kanato ang nakasala nga wala lamang nasakpan. Mao nga bisan siya nasakpan nga nakasala, wala kini magpasabot nga siya dautan na kaayo. Dili ang pagkasakop kaniya kondili ang sala maoy dautan.

Ikatulo, buot itudlo ni Hesus nga ang matag paghukom makapahimo hinuong malisud alang sa nakasala nga mobati nga siya gihigugma. Sumala sa kasinatian, ang mga tawo nga nakabaton sa kaalam tungod sa gidugayon nila niining kinabuhia, mas maluloy-on ug mas makasabot. Samtang magka-edaran, ang tawo mas makasabot sa kakulangan sa uban tungod kay siya nakasinati usab sa maong pagkulang. Ang tawo nga nahingkod na mas makahinumdom sa ilang kabuang sa ilang kabatan-on nga angay sabton kaysa mas madali nga masuko ug mosilot sa nakasala.

Ang paglikay sa paghukom nagpasabot sa positibo nga panglantaw sa pagkat-on unsaon pagdawat sa kaayo sa matag usa ug sa dili pagpahamtang kaniya sa kasakit nga mamahimong bunga sa atong paghukom, sa atong limitadong panglantaw mahitungod kaniya. Apan dili kini igo nga pagpadayag sa kaluoy. Naghangyo usab si Hesus sa pagpasaylo ug pagpanghatag.