Ang tanang mga panghitabo sa usa ka katilingban duna gayuy dakong hinungdan

Mao kini ang nahitabo sa katukuran sa GKK sa Immaculate Conception.

Base sa saysay ni Inday Manila Lovitos, nga sa unang panahon, kasagarang himoong “fund raising” sa kapunungan mao ang “benefit dance” o sayawan diin magtuboy ug usa ka kandidata.

Niadtong tuig 1963, nagtinabangay ang mga batan-on sa New Matina sa pagsalmot sa usa ka benefit dance alang sa kandidatura ni Ma. Fe Agad didto sa Toril, Davao City. Matag Sabado mobiyahe siya alang sa canvassing sa benefit dance. Apan, atol sa first canvassing, paingon na sila sa Toril, nadautan ang ilang gisakyan sa Puan. Tungod niini, nwad-an ug kadasig ang kandidata nga mopadayon sa pagsalmot sa “benefit dance.” Ang natigom nga kwarta nga usa ka libo ka pesos (P 1,000.00) mao na ang nahimong seed money aron nga magtukod ug usa ka kapilya.

Gipamalit gilayon nila ug mga materyales alang sa pagtukod sa kapilya ang maong kantidad. Nagtinabangay ang mga sakop sa katilingban sa pagpanday niini sama nila ni Epreng Pelenyo, Tony Go, ug Sayong Manila.

Naghimo sila og asembliya nga gilangkuban sa tanang mga batan-on ug hamtong nga lumulupyo sa New Matina diin gidesisyonan ang patron, ang paghatag ug pangalan sa kapunungan ug ang pagpili sa mga opisyales.

Sa unang hisgutanan, dunay nagsugyot nga “Mother of Perpetual Help” ang mamahimong patron apan wala kini ma-uyoni sanglit duna nay kapilya sa tabok sa sapa nga nagbaton sa maong patron. Busa si Mrs. Aning Go misugyot nga “Immaculate Conception” sanglit dalaga man ang sinugdanan sa katukuran niini. Gikauyunan sa tanan nga ang mamahimong patron sa maong kapilya mao ang “Immaculate Conception.” Ang magdonate o mohatag sa imahen mao ang kanhing konsehal sa Davao nga si Tomas Monteverde Sr.

Samtang gikauyonan usab nga ang mamahimong pangalan sa katilingban mao ang NEMICO kon New Matina Immaculate Conception Organization.

Napili ang mosunod isip mga opisyales: Pangulo- Vicente Bartolata; Treasurer- Fausto Singson.

Maalagaron, aktibong nagpaluyo sa katukuran sa maong kapilya mao sila si Hermana “Erning” Estabillo nga maoy Mother-mother sa mga kabatan-onan, Gigi Rangas, Tony Go, Aning Go, Sayong Manila, Sayong Malazarte, Juan Simbayon. Aduna pay mga tawo nga nahimong opisyales nga nakatampo ug dako sa pagpalambo sa NEMICO ug sa kapilya. Sila mao si Mr. Wales, Mr. Alfeo Abellano, Mr. Honorato Garcia, Mr. Cortez, Plaza Family, Romulo Family, Romero Family, Herrera Family.

Ang unang nahimong unang Pangulo sa Liturhiya (PSL) mao si Mansueto Pelinyo, nasundan ni Mr. Amado Aranas, Arthur Alagan, Dodong Manila, Carding Ysais, Dodong Baliguat, Rudy Alagon, Tommy Buhion, Boy Ang, Dionic Abjelina ug si Mia Eric Ybaniez.

Ang unang nahimong Pangulo sa Panudlo mao si Carmen, nasundan naman si Inday Manila ug si Miss Ambulo, sunod sila si Ely Garcia, Pacita Posas, Norma Lamanilao, Debie Posas, Dondon Lamanilao, Ma. Theresa Labaya, Cherylene Jamito ug si Richard Manila.

Ang mga nahimong Presidente:

1. Cefriano Pelinio; 2. Juaning Herrera; 3. Pedring Romero; 4. Lourdes Albasite; 5. Manuel Serrano; 6. Benedicto Olalo; 7. Ruben Castillo; 8. Zosimo Posas; 9. Mercy Oliver; 10. Rudy Alagon; 11. Tommy Buhion; 12. Sonny Manaopanao 13. Rudy Alagon; 14. Ricardo Labaya.

Sa tuig 1983-1984 ang pamilya Villa-Abrille nagdonate og lote alang sa permanenteng lugar nga maoy nahimutangan sa kapilya karon.

Ug niadtong tuig 2016, samtang nagpahigayon sa iyang homiliya ang kura paroko nga si Rev. Fr. Leonardo Dublan, Jr. atol sa kapistahan sa ICC GKK, alas 430 sa kaadlawon, kalit lang nga nanglupad ang mga ibos kaniya hangtod nga nahuman ang iyang homiliya.

Mao kini ang gilantaw nga timaan sa pipila ka mga GSL ilabi na ang Tesorero niadtong higayona nga si Jimmy A. Libres nga gikinahanglan nang usbon ang gi-anay na nga estruktura sa kapilya.

Busa, sa tuig 2017, gipabuhatan ug design ug estimate sa mga gikinahanglan nga mga materyales alang sa katukuran sa bag-ong kapilya. Pinaagi sa giya ni Fr. Dublan, misugyot siya nga himoon nga dos andanas ang bag-ong kapilya alang sa disaster ug evacuation.

Glusad gilayon sa bulan sa Hunyo, sa katilingban sa ICC GKK ang usa ka halapad nga fund raising campaign pinaagi sa letters of solicitation, mga sinemana nga envelops alang sa mga donasyon, lakip na ang pledge cards.

Bulan sa Agosto gisugdan gilayon ang pagpatrabaho alang sa bag-ong gambalay. Sa dihang katunga na sa proyekto na ang natukod, miabot ang katalagman sa bulan sa Disyembre. Gilunopan ang tibuok Matina Gravahan. Tungod niini, giundang usa ang pagpatukod sa bag-ong kapilya samtang naningkamot pa nga makabangon ang mga sakop sa ICC GKK nga makabalik sa normal ang ilang pamuyo. Luyo niini, nagpadayon ang sinemana nga panagtapok alang sa Kasaulogan sa Pulong (KSP) matag alas 8 ang takna sa gabii sa adlawng Sabado.

Tuig 2018 mi-retiro ang kanhi Pangulo sa Katilingban ug gipuli ang Tesorero aron maoy mangulo sa ICC GKK.

Kanunay nga gi-ampo sa katilingban nga dunay tawo nga makadawat ug grasya ug ipaambit niya kini alang sa kahumanan sa proyekto ilabi na sa panahon nga mag-ulan, motulo pa ang ikaduhang andana sanglit wala pay atop ang ibabaw.

Hinay-hinay nga gipadayon ang proyekto ug sa dihang nakumpleto na ang estruktura alang sa pag-atop, gidungog ang pangaliya sa katilingban. Dunay us aka sakop nga mipatiwas sa konstruksyon sama sa pagtaod ug atop, pagpasemento sa ikaduhang andana ug sa pagtaod ug tiles sa unang andana kon ang main chapel.

Busa, gihimo ang pag-balaan sa kapilya, altar ug ambo pinaagi sa us aka seremonyas nga gipanguluhan mismo sa bag-ong kura paroko nga si Reb. Padre Zenon Ampong niadtong Disyembre 9, 2018.

Naglamampuson usab ang kasaulogan sa kapistahan nga gitakda sa Disyembre 12, 2018 pinaagi sa usa ka kasaulogan sa Santos nga Misa sa alas 9 ang takna sa buntag sulod sa bag-ong kapilya nga gitambongan sa sobra duha ka gatos ka mga sakop ug gi cover live sa facebook page sa DXGN 89.9 Spirit FM ug gisibya sa alas dose ang takna sa udto sa Katolikong Istasyon sa Arkidayosis sa Dabaw.

Sa pagkakaron, duna pay ginagmay nga mga gikinahanglan ang kapilya apan malaumon ug malipayon ang mga sakop sa ICC GKK nga sa hinay hinay matubag gihapon ang maong mga panginahanglan.

Apan ang labing mahinungdanon sa tanan mao nga ang matag usa, nagkahiusa ug nagsinabtanay samtang nagtinabangay alang sa kalambuan sa katilingban.

Uban sa panabang ni Santa Maria nga maoy patron, ang katilingban o GKK, buhi ug lig-on. Matinud-anon ug nagkahiusa sa pagserbisyo sa Ginoo pinaagi sa katawhan sulod na sa singkwentay singko ka tuig.

Sa pagkakaron, nagpadayon sa pagtubo ang maong katilingban isip mga PINIYALAN kansang mga lideres ug mga Pundok Banay naglihok subay sa gipalapad nga gipadako nga programa sa Parokya sa Ascension of the Lord diin nahisakop ang ICC GKK.

Gikan sa 18 ka mga Piniyalan sa kapin dos cientos ka mga sakop sa katilingban, misaka na kini karon ngadto sa kapin 50 ka mga PINIYALAN. Padayon nga nangampanya ang mga lideres aron nga matuman ang tinguha nga bisan ug katunga sa kinatibuk-ang mga sakop mamahimo na gayud nga mga PINIYALAN.