Ang Pasyon ug ang Kadaugan

Palm Sunday of the Lord’s Passion
Is 50:4-7 / Ps 22:8-9, 17-18, 19-20, 23-24 / Phil 2:6-11 / Lk 22:14 – 23:56

Kinsay walay problema kanato ning kalibutan? Kinsay wala makatagamtam sa kasubo, kahadlok og kamingaw? Ang tanang tawo, moagi gayud niining mga kasinatian, kon dili kagahapon, karon basin ugma. Mao kana ang kamatuoran. Samtang nagpuyo kita ning kalibutan, kanunay natong ikauban ang nagkadaiyang hagit, problema ug mga kasakit. Apan usahay, dili nato dayon kini madawat, busa man gani sa diha nga masinati na nato kini, moingon pa gayud kita: “ Ngano nga mitugot man ang Dios? Ngano nga naingon ako niini? Ang tawo sa kanunay nangandoy nga magmalipayon kanunay. Buot kita nga magpuyo sa kahayahay, kanang dili na kita maghago, ug sayon ra ang kinabuhi. Gusto natong walay problema og mga hagit. Naglikay kita nga makasinati sa dagkong problema sa kinabuhi. Ang tataw nga ejemplo ning atong pagpaka-aron ingon mao ang gibuhat ni Pontio Pilato. Nanghunaw siya sa iyang mga kamot, nga nagpasabot nga wala siyay labot sa panghitabo, ilabi na diha sa katilingban. Daw kanunay kitang buot mag ”playing safe” kay aron wala kitay kalabutan sa tanang panghitabo. Panahon na seguro nga susihon nato ang atong konsiyensya aron atubangon ang atong kaakohan diha sa kamatuoran nga ang mga hagit ning kalibutan kabahin diay sa atong pagka-kristyano. Kita usab diay nahilambigit sa mga sala ug sayop nga atong nabuhat nga mao ang hinungdan sa daghang mga problema, dili lang sa atong kaugalingon apil na ang problema sa katilingban. Tinuod mitugot ang Dios nga makasinati kita ning mga hagit sa kinabuhi, aron mahigmata kita sa kamatuoran nga isip iyang piniling katawhan, buot niyang ipaila nga kita lain sa kasagaran ug kita adunay sangon ug baruganan diha sa katilingban.

Ang Pasyon sa atong Ginoo, nagpadayag sa usa ka aksyon o lihok. Luyo sa iyang gisulti ngadto sa Amahan: “Nganong gibiyaan mo ako?”, siya wala mohunong didto, kondili miakto-milihok siya-gidawat niya ang pag-latus, gidawat ang ilang pagpanamastamas, pagpas-an sa krus, paglakaw padulong sa kalbaryo, pagdawat sa iyang kamatayon, nga mao ang pagbuot sa iyang Amahan. Tuod man namatay siya alang kanato nga mga makasasala, ug natuman na gayud ang saad sa iyang Amahan ngadto sa katawhan sa Dios. Sa iyang pagka-masinugtanon siya nabanhaw. Ang pagtulun-an nga gitanyag kanato ni Jesus tataw kayo. Siya miagi sa dakung hagit sa iyang kinabuhi inubanan sa pagdawat niini isip kabubut-on sa iyang Amahan. Siya gibayaw sa Amahan pinaagi sa iyang pagkamadaugon. Siya nabanhaw. Dakung gasa kanatong tanan, nga nakasinati sa mga hagit sa kinabuhi tungod kay gihatagan kita’g paglaum, inubanan sa grasya, nga sa atong pagdawat ning mga problema, kasakit, mga hagit sa kinabuhi, mahimo usab kitang magmadaugon, sama kang Jesus. Busa angayan kitang malipay sa mga hagit nga moabot kanato ning kinabuhi,og paningkamutan nga dili sa kanunay manghugas sa atong mga kamot. Dili ba ikalipay nato kini nga kamaturoan? (Sr. Rica G. Dalaguit, fsp.)