Unang Misa sa bag-ong GKK gihimo

Emosyonal nga nagpasalamat ang PSK nga si Mira Acobo sa GKK San Antonio de Padua sa kalampusan sa gipahigayong unang misa ug pag-blessing sa bag-ong kapilya niadtong Pebrero 28, 2019 sa alas otso sa buntag.

Matod pa ni Fr. Jess Samaniego, kura paroko sa Miraculous Medal, Indangan, diha sa iyang homiliya nga unta ilang mapalambo ang maong GKK inubanan sa giya sa ilang patron Sr. San Antonio.

Ang maong GKK namugna ug natukod tungod sa kagustuhan ug kahiusahan sa mga tawo nga nagpuyo sa maong dapit. Gani man sila mismo ang niduol sa kura aron mahibaloan kung unsay ilang buhaton aron mamahimo silang usa ka GKK. Busa gihangyo sila ni Fr. Jess nga moapil sa basic seminars aron makasugod na sila sa ilang tagsa-tagsa ka ministriya.

Ang tanang GSL sa maong GKK niapil sa basic seminar nga gipahigayon alang kanila.

Sa pagkakaron ang GKK gilangkoban og 48 ka membro ug ang mga GSL regular nga mitambong sa mga meetings sa matag ministriya ug sila ang ika-30 nga GKK nga sakop sa maong parokya. (Vilma Albofera | OLMMP SoCCom)