Puy-i ang pagkamatarong aron ka mahilangit

20th GKK Fiesta Celebration
Viva! San Jose Esposo ni Maria
TEMA: “20 ka tuig nga panaw sa pagtoo, kamatinud-anon ug pasalamat.”

Sa unang mga pulong sa iyang homiliya ang Kura Paroko sa GKK San Jose, bana ni Maria, sakop sa parokya sa Immaculada Concepcion, Mintal nagpahimangno sa sentro sa kasaulogan sa piyesta nga mao ang Santos nga misa. “The center of the celebration of our fiesta is the holy eucharist,” matod ni Fr. Johnny Autida. Sumala sa GKK Norms ang misa anaa ang “utmost importance of the GKK fiesta, the core of the celebration of the fiesta.”

Gipahimangnuan niya ang mga sakop sa maong GKK nga nagsaulog sa ika-20 katuig nga “kung walay misa, kutob lamang sa lamesa, walay piyesta, nagpakaon ka lang.”

Sa iyang pamalandong mahitungod kang San Jose, iyang gisaysay nga si Jose matarong nga tawo. “Mao nay matarong nga bana, dili pakaulawan ang asawa. Karon kamong mga bana wala ba ninyo pakaulawa ang inyong mga asawa?”

Gihagit niya ang mga bana, “Isip bana kung dili maayo ang akong batasan, akong gipakaulawan ang akong pamilya, dili lang ang akong kaugalingon.”

Sa laing punto, matod pa ni Fr. Autida, ang pagkamatarong ni Jose anaa sa pagtuman sa kabubut-on sa Ginoo. “Ang matarong nga tawo diay usa ka tawo nga masinugtanon sa kabubut-on sa Dios. The criteria of a maayong tawo is you always do the will of God dili atong kabubut-on.”

Dili angayan, matod ni Fr. Autida, nga aduna kitay idol. “Kung maghisgot tag matarong o kaayo ang Ginoo maoy atong sumbanan. Usa ra ang maayo, ang Ginoo. Maong delikado kung mag-idolize ta og tawo. God is our standard. Si San Jose matarong nga tawo dili kay duna siyay matarong nga gihimo kondili tungod kay mituman siya sa gisugo kaniya.”

Gitapos ni Fr. Autida ang iyang pamalandong sa paghagit sa matag usa nga puy-an ang pagtoo, sama kang Abraham, aron kita mahilangit.