Pastoral Day sa SATMI malampuson

SERIOUS! Maka-serious diay ang motambong og Pastoral Day sa SATMI. Kani ang akong nasinati sa 1st time nako nga pagtambong niini March 9, 2019 sa alas 3:00 hangtud alas 6:00 sa hapon sa SATMI gym. Sayo ko nga nakaabot sa venue mao nga nakaobserve pa ko sa mga off-camera nga mga kalihukan sama sa pagtiwas pa og decorate sa entrance ug sa stage. Diha pa lang nakaingon na ko sa akong sarili “Wow hawoda ba aning mga seminaristaha — kaguapo ba tan-awon sa mga papel nga giporma og dove!” (Para mahatagan ug emphasis ang temang “Peace be with you!”)

Sa nangabot na ang uban natingala ko naa may mga estudyante from Assumption School of Davao dayon mga batang naka-costume og “Lumad,” ay dili mga Lumad gyud diay sila nga mga bata dayon aduna pud naka Muslim attire and of course naa pud ako mga kaubang GSL sa pito (7) ka sona nga sakop sa parokya sa OMPH.

Sa nagsugod na ang programa pinaagi sa “Doxology” nga gikan sa Spiritual Committee nila matod pa sa emcee na-amaze na pud ko kay nganong naay organ nga mag-acapella ra man diay si Bro. Leony Cajilig pero first part lang diay to nga acapella siya kay sa mga nisunod na nga verses with organ na ug tulo (3) na silang nikanta og “One More Gift” — kabalo man mi anang kantaha so nisabay pud mi. Nisunod ang singing of the “Philippine National Anthem”. Si Sr. Miriam Alejandrino, O.S.B ang nag opening remarks — matod sa emcee siya ilahang dean. The message was short but so welcoming. Si Brod Jeffrey M. Lozano, CSsR mao ang nihatag sa “rationale” why nagkatapok ming tanan anang adlawa – about peace gyud lagi.

Presentations ang misunod gikan sa mga students sa Assumption School of Davao — usa ka peace song ang gikanta sa babaye ug lalaki nga students nila — guapo silag mga tingog, hawod mogitara ang lalake, ang iyang pamaagi sa pagduyog lahi sa kasagaran. Abi nako mao ra to dili pa diay ang next nga presentation grupo na sa mga students. Naa silay narrator nga nagexplain sa amoa giunsa nila pagka-come-up sa maong scenario sa panahon pa sa pasko. Tinuod man gikanta nila ang 12 days of Christmas with their different wishes (materialistic wishes) dayon adunay malanog nga tingog nga nag-ingon “Christmas is cancelled!” Well diri nga part na gi-educate tong mga nagwish nga ang ilang mga wishes para lamang sa ilang mga self — asa na man ang para sa uban? Sa mga biktima sa kagubot, sa mga biktima sa kalisud, sa mga nawad-an ug mga panimalay ug uban pa!

Nisunod ang input gikan sa 1st speaker nga si Mr. Jong Monzon (Secretary General PASAKA). Kani nga panahon ang akong obserbasyon mas nisamot na mi ka-serious sa pagpaminaw kay aduna siyay mga history nga gihatag nga para sa akoa kadto lang nako nahibaloan — nakaremember ko sa three (3) sides of a story — iyang version, ilang version ug ang version sa kamatuoran. Nakabasa or nakadungog siguro ko ani pero karon lang ko kapaminaw niya unya nangita ko karon sa kamatuoran. Makalolooy ang picture nga napaint sa maong mensahe pero makalipay pud nga mahibaloan nga adunay parte ang ubang katawhan dili pa lang siguro tanan aron mapagaan ang kabug-at nga ilang nasinati. (Ang mga SATMI students nagahimo sa ilang pastoral exposure sa lain-laing area — pastoral day mao ang ilang culmination sa ilang pastoral duty.)

Sa bahin nga nagpresent na ang mga batan-ong lumad didto ilang gipakita pinaagi sa ilang pagsayaw ang ilang mga experiences sa kinabuhi. Didto pud ko nakahibalo nga aduna diay mga grupo sa lumad nga padayong nagaeskwela bisan diha lang sa ilang shelter diri sa Davao. (Adunay pass the hat nga nisunod ug gidonate alang kanila — naa pay nidonate ug duha (2) ka sakong bugas.)

Ang among mga youth sa GKK nga maoy nagrepresent sa amoang grupo though adunay tema nga “peace” gihapon pero mas modern na ilang approach. Morag naulaw ata sa mga bisita (nagsayaw nga dili motan-aw namo) pero masabtan ra pud kay semana lang baya ang pagpahibalo kanila nga sila diay ang presentor.

Ang ikaduhang speaker nameet ko na ni sa exposure namo sa 4th NCMC (nga 1st time pud nako natambongan.) Siya ang proxy sa iyang papa nga speaker unta from the Muslim Community. Very informative ang iyang mga comparisons sa pag-observe sa mga kalihukan nato bahin sa peace gawas o sulod man sa simbahan. Keywords niya ang “respeto” ug “commonality”. Bitaw nganong dili man nato tan-awon ang atong mga pagkapareha imbes nga ang pagkalahi-lahi nato?

Sa final presentations sa grupo sa SATMI students nga nagdala ug lain-laing mga flag nga nagrepresentar sa mga lugar nga gigikanan sa mga students mas midako ang coverage para nako sa panawagan bahin sa kalinaw. Ang spontaneous prayer from different religious group makatindog balahibo ilabina kay lain-laing dialect ang gigamit sa mga representatives unya nisunod pa ang candle lighting ug communal singing “Prayer of St. Francis” — make me a channel of your peace.

Ang closing remarks gikan kang Fr. James Narisma nga gi-introduce ni Bro. Ronald Balase as Assistant Rector nakapakurat pud nako kay akong nahibaloan pa man is siya among Parish Priest pero matod pa niya siya na lang daw sa Closing Remarks kay wala si Fr. Bert. Nalipay siya sa kalampusan sa maong Pastoral Day nga gitambongan sa nagkalain-laing sector sa katilingban ug nihatag siyag panapos nga estorya nga para nako dili nako malimtan; kini mao ang estorya sa usa ka Hari nga himalatyon na ug ang iyang tulo (3) ka anak. Matod pa sa estorya nga gi-challenge sa hari ang iyang mga anak nga punoon ang isa ka kuwarto ug ang makadaog maoy makaangkon sa pinakadakong bahin sa iyang katigayunan. Tuod man ang kinamagulangan naningkamot gayud — gipuno niya ug “bato” ang kuwarto pero pagcheck pa wala gyud napuno kay naa man diay buslot mao nangahulog ang ubang bato. Ang ikaduhang anak gipuno niya ug “sagbot” ang kuwarto pero sama sa nauna wala gihapon kapuno kay naa lagiy buslot. Panahon na sa kamanghuran medyo naguol ang amahan kay luyahon man ang iyang kamanghuran; Ang kamanghuran nagsindi ug “kandila” ug YES bisan isa lang ka kandila pero napuno sa kahayag ang maong kwarto apil pa ang buslot! Mao nga ang nidaog ang kamanghuran!

Tinood nga ang gihimong kalikohan matod pa ni Fr. James “gamay pa lang sa pagkakaron pero pinaagi sa among pagtambong ug pagkahibalo kami makahinay-hinay usab ug share ngadto sa uban dayon sa hinay-hinay makab-ot ra nato ang “Peace be with you” nga atong ginadamgo. (Marieta Comighud | OMPH SoCCom)