Pangulo sa Pagpanudlo, “Gitawag, Gihulma ug Gipadala”

Sulod ning panahon sa kwaresma ginapahigayon ang mga renewal recollection sa nagkadaiyang mga parokya. Ang mga Pangulo sa Pagpanudlo (PSP) o mga Katekista sa Miraculous Medal Parish sa makausa pa nagbag-o sa ilang mga panaad isip lumilihok sa parokya ug sa GKK. Adunay 46 ka mga PSP nga nagtahan sa ilang kaugalingon alang sa maong pagpangalagad. Ang ilang renewal recollection gipahigayon niadtong Marso 17, 2019 didto sa Franciscan Friars, T.O.R compound, San Miguel, Indangan.

Matod pa ni Seminarian Nicanor Balabat, ang recollection master niadtong higayona, nga ang pagpangalagad usa ka pagtawag sa Ginoo. Ang pagpanudlo dili usab sayon tungod kay una ka motudlo sa GKK o sa eskwelahan angay nga matudloan ang imong kaugalingon pag-una ug ang pamilya sa mga pagtulun-an sa simbahan ug ang pagsunod sa kabubut-on sa Dios, matod pa niya.

Human sa maong recollection, gipahigayon ang pagpadala sa mga Katekista niadtong Marso 24, 2019 atol sa alas otso nga misa sa buntag nga gipangulohan ni Fr. Jess Samaniego, ang kura paroko sa maong parokya. Ang mga katekista adunay ginahimo nga pormasyon matag bulan alang sa kalambuan sa ministriya ug sa bulan sa Abril ipahigayon na usab ang usa ka seminar workshop alang sa pagpangandam sa umaabot nga kalihukan sa Flores de Mayo. (Anabelle Encluna | OLMMP SoCCom)