Pangayog pasaylo bisan lisud mopasaylo kay ikaw pasayloon

Ikaupat nga Domingo sa Kwaresma
Jos. 5:9a, 10-12 / Sal. 34:2-7 / 2 Cor. 5:17-21 / Lk. 15:1-3, 11-32

Ang estorya sa anak nga mausikon, anak nga masinugtanon ug sa Amahan nga mapasayluon pahimangno ni San Lukas sa mga Pariseyo tungod sa ilang pagdumili pagdawat nga sayon lamang alang kang Hesus ang pagpakig-uban ug pagpasaylo sa mga makasasala. Dili nila masabtan ngano nga ang Dios dali lamang makasabot sa kakulangan niadtong mga nakalapas sa balaod.

Gipakita ni San Lukas ang dili masukod nga kaluoy sa Ginoo. Kini iyang gipresentar pinaagi sa pagsaysay ni Hesus sa nindot nga sambingay. Apan makita usab dinhi ang posibleng laksot ug dautan nga dagway sa tawo. Adunay mga tawo nga gahi gayod mopasaylo sa isigkatawo nga nagbasol. Diha lamang sa atong pagdawat sa mga nakasala ug sa pagpasaylo kanila masukod kung unsa gayod kita katinuod nga mga anak sa Dios.

Usahay mahimo nga kita ang anak nga nag-usik-usik, nga walay huna-huna unsa kasakit ang pagpangayo sa atong bahin sa katigayonan, nga miwaldas niining tanan ug naputos sa bisyo hangtod nga nahurot ang tanan. Apan ang nindot mao nga nakaamgo kita nga daku diay ang atong sala. Gisayangan nato ang dakung gugma nga atong nasinati sa mga bukton sa atong Ginoo. Mao nga nagbasol kita, gidawat ang atong pagkamakasasala, mipauli ug nangayog pasaylo. Ikaw ba nagbasol, nangayog pasaylo ug nagbag-o?

Apan usahay, mahimo usab nga kita kadtong anak nga magulang, nga masinugtanon ug kugihan, nga anaa uban kanunay sa amahan, nga miatiman uban sa respeto sa mga katigayonan sa Ginoo. Apan ang nakaparat ug nakapait niining maong kahimtang mao nga nagmagahi kita sa pagdawat sa nagbasol ug mibalik nato nga igsuon. Wala na nato dawata ang pagkakaplag sa atong isigkatawo. Wala nato ikalipay ang pagkombira nga pasalamat nga gihimo sa atong Ginoo tungod kay nakauban na nato pagbalik ang atong isigkaingon. Ikaw ba nagdumili pagdawat ug pagpasaylo sa nakasala?

Apan ang amahan, ang Dios, midawat ug mipasaylo sa kanatong iyang mga anak bisan sa lain-lain natong kinaiya. Wala siyay gipalabi. Naghingapin ang iyang gugma. Dili siya magkwenta. Andam siyang modawat kanunay ug mopasaylo.