OMPH Parish nangandam sa Kwaresma

Schedule alang sa Lent Reflection ang usa sa mga agenda sa March 3, 2019 meeting sa mga Pangulo sa Katilingban (PSK) ug mga SocCom sa pito (7) ka sona sa parokya sa Our Mother of Perpetual Help Bajada. Tema sa maong mga pamalandong esentro sa “Political Education” tungod sa umaabot nga national election karong tuiga. Adunay lima (5) ka grupo sa mga parish formation team nga maoy mohatag sugod sa March 9 dayon March 23, ug March 30, 2019. Oras sa Kasaulogan sa Pulong (KSP) ang gamiton para sa maong reflection nga kalihokan. Gilauman nga daghan ang manambong aron daghan ang mahimong andam sa pag-abot sa panahon sa pagpili sa atong mga lideres sa nasud sa mosunod na pud nga mga katuigan.

Gipahinumduman usab sa maong meeting ang mga PSK o SocCom nga adunay gisuportahan nga kandidato nga mo-file gayud og leave of absence samtang ang campaign period nagapadayon.

Sa March 6, 2019 adunay upat ka mass schedule alang sa “Ash Wednesday” para maserbisyohan ang kadaghanan. Magsugod ang mass sa alas 6:00 sa buntag dayon alas 12:00 sa udto, alas 5:00 sa hapon ug para makahabol pa gyud ang mga nanarbaho adunay last mass sa alas 6:20 sa gabii. Sa mga walay pamasahe o dili gyud makaadto sa simbahan pwede sila nga sa kapilya na lamang nila motambong tungod kay aduna usab pagbadlis nga ihatag sa mga Pangulo sa Liturhiya (PSL) pero kinahanglan nga ang mobadlis nga PSL nakatambong gayud sa misa anang adlawa.

March 10, 2019 sa alas 6:00 sa buntag mao usab ang “Alay Kapwa launching”. Mga GSL gilauman nga manambong sa maong Misa. Human sa launching makasugod na dayon ang matag GKK sa ilang balay-balay nga pagbisita sa matag miembro sa GKK — panahon kini nga makahalad ang pamilya sa ilang mga grasya (kuwartang natigom sa paglikay sa usa ka naandan nga pagpamalit — sakripisyo para sa panahon sa Kuwaresma.) Mga botelyang gisudlan sa kwarta ilang ihalad panahon sa Misa human sa Easter Sunday.

Sa laing bahin adunay “Youth Pilgrim Cross” activities usab ang mga youth sa March 10, 2019. Alas 4:30 sa hapon aduna silay Holy Mass nga tambongan dayon ilang eprusisyon ang Pilgrim Cross ngadto sa Zone 1 GKK; adunay silay mga pag-ampo ug input nga ihatag didto. Pagkasunod semana ila na pod kining ibalhin sa laing GKK hangtod nga masuroy nila tanang GKK. Target nga mahuman nila kini taman sa November 2019. (Marieta Comighud | OMPH SoCCom)