Mga Taga GKK San Jose Nagpabiling Lig-on ug Mabulukon sa Ika-72 Anibersaryo

Dakong garbo karon sa mga taga GKK San Jose sa Balusong ubos sa Ascension of the Lord Parish nga nagsaulog sa ika-72 nga kapistahan niadtong Marso 16, 2019.

Apan luyo sa kadugayon sa ilang Kristohanong Katilingban, dakong hagit alang kanila ang pagkawagtang sa pipila ka mga sakop kinsa mibalhin na sa pagpuyo, mibalhin sa pagsimba, ug kadtong mga mihalin na sa laing kalibutan gawas pa sa hinay-hinay nga pagkausab sa ilang residensyal nga dapit ngadto sa komersiyal nga gamit sa mga yuta.

Hinoon, bisan sa pipila ka mga nahabilin nga sakop sa katilingban, nagpabilin silang lig-on, hiniusa ug maunungon sa ilang pagtoo ilabina nga ang ilang patron si San Jose, ang bana ni Birheng Maria ug mibarog nga amahan ni Hesukristo.

Siya ang modelo sa mga taga San Jose Balusong sa kalig-on sa ilang baruganan ug pagtoo ngadto kang Kristo.

Sumala sa Pangulo sa Katilingban nga si Engr. Noel Justiniani, mas mabulokon ug meaningful ang ilang pagsaulog sa kapistahan karong tuiga sanglit sa unang higayon gihimo ang tulo ka adlaw nga reflection sulod sa siyam ka adlaw nga nobena, diin sa katapusang gabii gipahigayon ang bihilya atubangan sa blessed sacrament.

Atol sa Santos nga Misa niadtong Marso 16, 2019 gidasig ug gidayeg ni Fr. Zenon B. Ampong ang katilingban sa gipakitang panaghiusa ug kalig-on sa ilang paglahutay isip Kristohanong Katilingban.