Mga Katekista gasa gikan sa Ginoo

Sa sulod sa parokya sa San Miguel Panacan adunay pito (7) ka mga eskwelahan diin ang unang pagpakompisal ug pagpangalawat gihimo. Sa walay kakapoy ang among mga katekista gipangulohan sa PSP Coorndinator nga si Marilou Ipal, inubanan sa School Catechists.

Pagsugod sa bulan sa Enero, mao ang panahon diin gihimo ang pagpasabot ug pagpaila sa mga kabataan kang Hesus pinaagi sa Iyang balaang dagway diha sa Eukaristiya ug ang ka-importante sa pagpangayo og pasaylo sa atong Ginoo pinaagi sa pagpangompisal sa pari, nga mao gipiyalan dinhi sa yuta sa paghatag og pasaylo.

Paghuman ang pagpangalawat diin mao ang buhing ebidensya sa hingpit nga pakig-uli human sa pagkaon sa lawas ni Kristo.

Si Marian Pearl Villacorte, Grade III pupil sa AFPLC Panacan, usa sa nakadawat sa maong sakramento sa pagpangalawat ug pagpangompisal. Sa linghod nga edad iyang nasabtan kung kinsa si Hesus. Sumala pa niya malipayon kaayo siya kay nakakompisal na sya.

Ug labaw sa tanan lipay kaayo siya kay makakaon na siya sa lawas ni Kristo ug excited mouban sa iyang Mama mosimba matag Dominggo.

Ang mga Katekista nga matinud-anon ug walay kakapoy sa pagpanudlo ug alagad sa Simbahan, gasa gikan sa Ginoo aron sa paghulma sa kaalam sa mga kabataan sa kinabuhi ni Kristo.

Ang mga Pangulo sa Pagpanudlo mao ang nanguna sa pagpaila sa mga kabataan kung kinsa si Hesus sa tagsa-tagsa nga kinabuhi.

Ug kung unsa ka-importante ang pakiglambigit sa atong Ginoo. Importante gayud ang pagpanudlo nga gihimo sa mga Katekista ilabina sa mga kabataan nga mao pa gyud ang paila-ila kang Hesukristo. (Liezl Gilbuena | SMP Parish SoCCom)