Kasalan sa Parokya gipahigayon sa Santiago Apostol

Niadtong Marso 2, 2019 (Sabado), nagpahigayon og Kasalan sa Parokya ang Santiago Apostol, Barangay Bunawan, Davao City nga gipangunahan sa Kura Paroko nga si Rev. Fr. Rolando O. Mandreza, DCD, inubanan sa Barangay Bunawan Council nga gipangulohan sa Kapitan nga si Ronie Odeña. Diin adunay 81 ka pares ang nidawat sa Sakramento sa Kaminyoon.

Atol sa maong seremonyas, ang basahon naghisgot sa Unang Milagro nga gipakita ni Hesus sa Kasal sa Cana. Diin gihimo niyang bino ang tubig ug nga kini nagasimbolo sa kasagrado sa kaminyoon. Sa homiliya ni Rev. Fr. Mandreza, siya nag-ingon nga ang mga kaslonon “gihiusa sila sa Diyos ug gitawag sila sa usa ka Kristohanong Kaminyoon.”

Dungag pa niana, iya usab gipaklaro ang kabililhon sa pagpakasal nga nahisulat sa Mateo 19:6 nga nagkanayon, “Tungod niana, dili na sila duha kon dili isa. Busa, ang sa Dios gihiusa, sa tawo dili pagbulagon sila.”

Sa katapusan, iyang gipahimangnuan ang mga kinasal nga “ang gugma sa mag-asawa magsalamin sa gugma sa Ginoo sa ilang pamilya diin gitawag sila nga mamahimong malahutayon, lig-on ug makanunayon bisan pa man sa mga pagsulay nga ilang maagian ug nga magkinabuhi sila nga puno sa pagpasensya, pagkamapasayloon ug pagkamahigugmaon sa matag usa labina sa ilang pamilya.” Kining maong aktibidad gitambungan usab sa mga parokyano og ilabihan nilang kasadya ug kalipay nga nasaksihan ang maong Sakramento. Dako gayud nga pasalamat ang gibutyag sa kura paroko sa mga taong nagpaluyo niining tanan aron kini mamahimong malampuson. (Ervie Ghen Pelderos | SJP Bunawan SoCCom)