Kapistahan ni Sr. San Jose gisaulog

Adunay mga Gagmay’ng Kristohanong Katilingban (GKK) nga nahisakop sa parokya sa St. Mary of the Perpetual Rosary nga nagasaulog sa “secondary patron”. Usa na niini ang GKK sa Our Lady of Fatima, Buhangin diin gisaulog sa unang higayon ang kapistahan ni Sr. San Jose nga bana ni Maria ug ama-ama ni Jesus niadtong Marso 19, 2019 sa alas 6:00 sa gabii.

Ang Santos nga Misa gipangulohan sa Kura Paroko, Rev. Fr. Dionisio C. Tabiliran. Gipaambit sa Kura Paroko ang mga hiyas ug bertud ni Sr. San Jose — ang iyang pagkamatarong, pagkamasinubtanon ug ang pagkamahadlokon sa Dios inubanan sa iyang pagkamakugihon ug dakong pagkamatoohon nga maoy sukaranan sa iyang pagsalig ug pagtuman sa kabubot-on sa Dios. Nanghinaut nga kining mga hiyas ni Sr. San Jose maoy mamahimong panig-ingnan sa katilingban inubanan sa paglaum nga mamahimo kini nga masunod sa mga miembro sa katilingban ilabina sa mga amahan nga maoy mo-protekta sa ilang mga anak diha sa katilingban. Viva! Sr. San Jose. (Justina Abapo | SMPRP-GKK SoCCom)