Ilha ang mga Haylo sa Sala

Unang Domingo sa Kuwaresma
Dt 26:4-10 / Ps 91:1-2, 10-11, 12-13, 14-15 / Rom 10:8-13 / Lk 4:1-13

Usa ka adlaw, gipangutana sa usa ka batan-on ang tigulang na kaayo nga Obispo sa pag-ingon: Obispo, karon nga tigulang ka na kaayo, nakasinati ka pa ba ug pagsulay? Mikatawa ang Obispo ug miingon, “Ang patay lang ug kadtong atua na sa langit ang dili na makasinati sa pagsulay.”

Tinuod, ang pagsulay usa ka pait nga kamatuoran, isip tawo. Kitang tanan pagasulayan sa demonyo. Ang tentasyon sa demonyo, magpabilin hangtod gani sa katapusang yugto sa atong kinabuhi. Sama pananglit sa kasinatian ni Santa Teresa sa Calcutta. Bisan diha sa pila ka minuto sa bung-aw sa kamatayon, gitintal pa siya sa iyang pagtuo sa Dios.

Adunay tulo ka butang nga sagad gamiton sa demonyo sa pagkabig sa tawo pahilayo sa Dios: Una: Ang materyal nga mga butang, sama sa salapi: “Ang tawo dili gayud makakita sa tinuod nga kinabuhi, pinaagi sa mga materyal nga butang. Bisan modugang ang imong kadato, ayaw pagsalig niini.” Ikaduha: Ang gahum, mahimong gamiton alang sa pagdaugdaug sa uban; “Ang mga halangdon sama ka walay bili, kon timbangon sila, wala silay gibug-aton.” Ikatulo: Ang pagka-dungganan: matod pa sa Salmo: “Anaa sa Dios ang matuod nga kadungganan.” (Salmo 62) Ang malisod nga paagi sa pag-alagad ug ang pag-antus magdala kanato sa krus, apan human sa krus, maato ang korona sa kinabuhing dayon. Mao kini ang atong nadunggan sa atong Ebanghelyo karong Domingoha. Si Jesus mismo gitintal niining tulo: Hangtod karon mao gihapon kini ang pamaagi nga gigamit sa demonyo. Nasayod ang demonyo nga epektibo kaayo kining mga butanga: material nga mga butang o salapi, gahum ug pagkadungganan, tungod kay mao kini kanunay ang pangandoy ug damgo sa tawo.

Ang tawong buhong sa materyal nga mga butang o dato, dali mahimong gamhanan, ang tawong gamhanan dali ra nga mahimong inila ug ang tawong ilado o dungganan, dali ra usab mahimong bahandianon. Nahibaloan nato nga kining tulo, dili gayud makatagbaw sa tawo. Busa bantayan nato nga halayo kita niining mga pagsulay kay kini sila makapadako sa atong ulo ug kasingkasing, ug magpahilayo kanato sa Dios. Mahimo lamang kining tulo, salapi, gahom ug dungog nga magmabungahon sa tukma nga paagi kon ato silang gamiton alang sa kaayuhan sa atong isigkatawo ug ihalad sa Dios, ug dili himoong kaugalingnon pagpaburot. Atong hinumdoman nga: “Kon walay Dios, wala kitay hinungdan.” Aduna lamang kitay hinungdan kon haduol kita sa Dios. (Sr. Rica G. Dalaguit, fsp)