Ika-36 nga kapistahan sa San Pablo Parish gisaulog

Masadyaon nga gitambongan sa mga kadaghanang parokyano ang mga aktibidad sa San Pablo Parish sa Juna Subdivision, Matina, Davao City isip pagsaulog sa ika-36 nga kapistahan niadtong Pebrero 21.

Sumala kay Parish Priest ug Auxiliary Bishop of Archdiocese of Davao Most Rev. George Rimando nga ang tema karon sa kapistahan, “San Pablo, sumbanan sa mga batan-on nga gihigugma, gigasahan ug gigamhanan,” napili tungod kay grabe ang pagkamanggihatagon ni San Pablo sa iyang kaugaligon ngadto sa Diyos ug sa katawhan nga angay sundugon sa mga kabatan-onan hilabina nga ania kita karon sa ginatawag nga ‘Year of the Youth.’

Dugang pa ni Bp. Rimando nga bisan og dili apil sa orihinal nga 12 apostles si San Pablo apan nabati niya ang gugma sa Diyos inubanan sa giya sa Ispiritu Santo nga nagtawag kaniya nga mahimong usa ka apostoles aron isangyaw ang maayong balita hangtod karon pinaagi sa iyang mga sulat.

Biyernes pa lang sa kagabhion, Pebrero 15, nagkahiusa na ang mga kabatan-onan gikan sa nagkalain-laing GKK aron mupasundayag sa ilang mga talento ug magahalad og pagsimba sa Diyos atol sa Youth Jam 2019 nga gipahigayon sa San Pablo Parish Pavilion.

Samtang pagka-Sabado sa gabii, Pebrero 16, gipahigayon ang Retro Party atol sa GKK’s Night 2019 diin kadaghanan sa mga mitambong ug mipakita sa ilang abilidad sa pagsayaw sa mga kinaraang tugtog sukad 1960s mao ang mga kababaihan ug mga inahan.

“Bibo gyud kayo karong pistaha. Mas nalingaw ming mga nanay karon ug mas ganahan ko sa dagan sa mga aktibidades kumpara atong nilabay nga tuig,” sumala kay Zenia Balzon nga nahisakop sa GKK sa Del Carmen Village, Matina Aplaya.

Sa mismong adlaw sa kapistahan, Huwebes, gisugdan sa sayong kabuntagon ang prosesyon uban sa rebulto ni San Pablo palibot sa komunidad sa parokya aron usab maipaabot sa mga molupyo nga sugdan ang adlaw nga mapasalamaton sa tanang panalangin sa nilabayng katuigan ug paghinumdom sa mga maayong buhat ni San Pablo.

Ang unang misa sa kapistahan gipangulohan mismo ni Most Rev. George Rimando, D.D., ug gisundan sa mismong Parochial Vicar Rev. Fr. Henry Campeon, D.C.D. kinsa siya usab ang mibawtismo sa 324 ka mga bata. Samtang si Rev. Msgr. Leonardo Vicente, V.G., P.C., ang Rector sa San Pedro Cathedral ang midala sa ika-tulo nga misa, ug si Rev. Msgr. Paul Cuison, JCD, sa ika-upat nga misa.

Dungan nga nagsalu-salo sa mga giandam nga handa ang mga katawhan gikan zone 1 hangtod zone 13 atol sa paniudto sa sulod sa Pavilion diin nakadawat usab og usa ka-lechon ang matag zone.

Padayon nga naglingaw ang mga katawhan sa sulod gihapon sa Parish Pavilion sa dihang gipahigayon ang mabulokon nga Drum and Bugle Corps (DBC) Contest diin gisalmotan kini sa tulo ka mga tunghaan sa dakbayan sa Davao.

Giila nga 2nd runner-up ang mga magtutungha sa Kabacan Elementary School, Maa, samtang 1st runner-up ang gikan sa Bayanihan Elementary School, Matina, ug ang nakakuha sa kampyonato mao ang mga batang estudyante gikan sa Matina Aplaya Elementary School, Matina Aplaya.

Usa gayud si Fr. Henry Campeon nga malipayong nagtan-aw sa mga reaksyon sa mga katawhan sa malampuson nga mga aktibidad isip siya ang gituboy ni Bp. Rimando nga mangulo sa pagprepara sa kasaulogan sa pista ni San Pablo.

Gipahayag ni Fr. Campeon nga ang mga positive response sa mga katawhan magsilbi nga motivation aron mas paninduton pa ang sunod nga mga kasaulogan. Gani iyang gibutyag ang plano nga sa sunod tuig ang tema mao ang Pistahang Nayon diin matag zone magtukod og mga purok o mga balay-balay sa sulod sa compound sa parokya, unya adunay luto-luto sa kilid aron mas ma-awhag pa sa daghang mga parokyano nga muapil.

“Nalipay ko pag-ayo kay nindot ang initiatives ni Fr. Henry. This year, today, is something different, bibo tood. Ug nanghinaot mi nga ang diwa sa pagkamanggihatagon sa kaugalingon ngadto sa Ginoo ug sa katawhan atong napahitabo karong adlawa,” pahayag ni Most Rev. Rimando. (Areo Bayno | HCDC Intern)