Dugo Mo Kinabuhi Ko

Dugo mo kinabuhi ko, mao kini ang sukaranan sa St. Mary of the Perpetual Rosary Parish sa mapadayonon nga pagpahigayon og Mobile Blood Donation (MBD) Program. Gipahigayon ang unang MBD sa tuig 2019 sa parokya sa St. Mary of the Perpetual Rosary Parish, Buhangin niadtong Pebrero 24, 2019 diin katimbayayong ang Department of Health – Davao Blood Bank Center. Gipahigayon ang MBD aron makatabang ug makaluwas sa kinabuhi sa mga parokyano ug ubang katawhan nga nanginahanglan og dugo.

Bisan pa sa security measures nga gi-implementar sa parokya nga adunay wala makasulod sa parokya sa maong adlaw; adunay siento sisenta y tres (163) gihapon ang nagpalista nga adunay intention nga magdonar og dugo, buot pasabot lamang nga nasinati na sa mga katawhan ang gugma sa pagtabang sa uban nga gusto moluwas sa laing kinabuhi pinaagi sa ilang pag donar sa ilang dugo. Adunay siento cuarenta y siete (147) lamang ang malampuson nga nakuhaan og dugo, ang wala makuhaan tungod sa adunay nagkalain-laing hinungdan.

Malampuson nga napahigayon ang maong kalihukan tungod sa pagtinabangay sa mga ministriya nga nahisakop sa parokya diin kini gipangunahan sa Parish Social Action Ministry (PSAM) nga gipangulohan sa MBD coordinator, Elizabeth Sabucido. Mapasalamaton ang PSAM coordinator, Joel Corage sa PSAM core group, Caritas, PSA, mga batan-on nga miembro sa St. Mary Action Response Team (SMART) ug ubang mga volunteers nga nihalad sa ilang kaugalingon diin sila kabahin sa nagmalampuson nga MBD ug sa suporta sa kura paroko, Fr. Dionisio C. Tabiliran diin mapasalamaton usab ang kura paroko sa PSAM core group ug mga volunteers. (Josephine M. Galorio | PSAM Secretary)