Suok nga GKK sa Digos Cathedral nagsaulog sa ika-51 tuig nga kapistahan

Mitungas si Rev. Fr. Judito O. Tampon kuyog ang pito ka mga batan-on didto sa bukid sa Ranao, Goma, Digos City niadtong Enero 22, 2019 aron makasaulog sa Santos nga Misa isip pagsaulog sa kapistahan sa GKK Sto. Niño sa musunod nga adlaw.

Sa ilang pagtungas, hilabihang kalisod sa ilang naagian tungod sa tungason nga dalan nga mas gipalisod pa sa ulan. Gani mga kapin upat ka oras silang nagbaklay gikan sa Brgy. Dulangan, Digos City ngadto sa ilang destinasyon.

Kung naghago ang taga sentro sa pagtungas didto, wala usab nagpalupig ang mga miyembro sa maong GKK. Aron nga mahimong hapsay ug malampuson ang ilang kapistahan, hilabihan nga pagpangandam ilang gihimo. Gani nakapadasig kini kang Jhonie Latonio, usa sa mga batan-on nga mikuyog sa pari ug taga Zone I, GKK Sto. Niño Tubor, Goma, Digos City kay nakita niya nga anaay kahiusahan ang mga katilingban luyo sa kalayo ug kalisod sa dalan ilabina kung mag-ulan.

Dako kaayo ang kalipay sa mga ginsakpan sa maong kapilya kay sila nahatagan og higayon nga makatambong sa Santos nga Misa. Mapasalamaton sab ang ilang GKK leader nga si Lito Gocotano kay mi-abot si Fr. Tampon sa ilang lugar, ilabina nga sa kamatuoran nga sa usa ka tuig mamisahan ang ilang GKK.