Seguridad sa ordinasyon ni Bp. Lunas gipangandaman

“Kung mahimo dili na magdala ug backpack aron dili ma langan.”

Mao kini ang apila sa publiko ni Rev. Fr. Erick Parantar kinsa mao ang Committee Head sa Security alang sa ipahigayon nga Episcopal Ordination ni Bishop-Elect Ronald Bong Lunas, STL karong Pebrero 11, 2019 sa Mary Mediatrix Cathedral, Digos City, Davao del Sur.

Sumala pa nga ang maong paghangyo alang sa pagpangandam sa seguridad sa okasyon, ilabina nga adunay bagang duot sa katawhan ang motambong sa selebrasyon, ingon man adunay mga importanteng mga bisita nga buot mosaksi sa talagsaong higayon nga gikan pa sa nagkadaiyang dapit sa nasod.

Gipahibalo usab ni Fr. Parantar nga alas onse pa lamanng sa kabuntagon hantod kanus-a mahuman ang ordinasyon pagasirad-an ang dalang Rizal Avenue kanto Roxas, ingon man ngadto na sa Landbank ug ang dalang Gallarde tungod sa likod sa Cathedral i-parking ang mga sakyanan.

Dugang kabahin sa hisgutanang sakyanan, mihangyo usab siya sa katawhan nga kung mahimo dili magtagsatagsa magdala og sakyanan aron adunay maparkingan, mas maayo nga grupo nga motambong sa maong okasyon.

Samtang ang paghugot sa seguridad gikompirma usab kini sa tigpamaba sa Davao del Sur Police Provincial Office nga si PSI Grace De Castro aron walay dautang indibidwal nga makahimo og kasamok sa talagsaong higayon.

Mahinumduman nga gi-anunsyo ni Bishop Guillermo Afable, DD niadtong Disyembre 22, 2018 ang pagpili sa Santo Papa nga mamahimong Obispo sa Diocese of Pagadian, Zamboanga del Sur si Fr. Lunas.