Salig sa Ginoo, kay mabulahan Kita!

Ika-unom nga Domingo sa Ordinaryong Panahon
Jer 17:5-8 / Ps 1:1-2, 3, 4, 6 / 1 Cor 15:12, 16-20 / Lk 6:17, 20-26

Ang pagka-bulahan sa tawo, kinahanglan masabtan sa lamdag sa misyon nga gibutyag ni Jesus — Unsa man kini? “Ang Espiritu sa Ginoo, ania kanako. Gidihogan ako niya aron pagsangyaw sa Maayong Balita ngadto sa mga kabus.” Sama kang Jesus, kita nakadawat man sa Espiritu Santo, nadihogan usab aron mahimong andam sa pagsangyaw sa Maayong Balita alang sa tanan. Apan labi pang atong masinati kini nga lamdag sa Espiritu Santo kon nagatuo kita nga kita bulahan, inubanan sa pagsalig nato sa Atong Ginoo. Kay walay tawo nga misalig sa Ginoo nga nagbasol sa katapusan. Ilabina sa pagsalig diha sa iyang gisaad diha sa ebanghelyo. Nga kita nahimong bulahan, pagalipayon, pagabusgon, gantihan tungod kay nagbuhat kita sa kabubut-on sa Ginoo, ilabina kon kita nagasalig ug nagalaum kaniya.

Gusto ba kitang mamahimong tinuod nga bulahan? Nan, kanus-a man nato sugdan ang pagbuhat sa mga butang nga magsugnod niining kabulahanan? Kanus-a man nato tul-iron pagbalik ang dalan padulong sa atong Ginoo? Kanus-a pa man nato sundon ang iyang kabubut-on. Kanus-a pa man nato biyaan ang mga butang nga makababag sa atong pagsunod kang Cristo? Ug labaw sa tanan, kanus-a nato hinluan ang atong kasingkasing sa mga butang nga iya ni satanas ug hulipan sa mga butang nga iya sa Ginoo? Lihok na igsoon, samtang dili pa ulahi ang tanan. Dili sayon ang pakig-away sa mga pagsulay ni Satanas, apan kon pinaluyohan ang atong paningkamot sa grasya ug panalangin sa atong Ginoo nga labing gamhanan sa tanan, posibleng magmadaugon kita. Si Jesus nga mao ang Maayong Balita ngadto sa tanan, mao usab ang makitang larawan sa maloloy-ong Dios, kinsa haduol sa mga nagsubo nga mga kasingkasing. Siya usab mao ang dangpanan sa tanan ug sa mga dinaug-daug. Kanus-a man kita moduol kaniya? (Sr. Rica G. Dalaguit, FsP)