Pamilya ni Bishop Bong Lunas, malipayon ingon man masigarbohon

Human sa ordinasyon ni Bishop Ronald I. Lunas, STL, DD malipayon ug mainitong nihatag sa iyang mensahe ang usa sa babayeng manghod ni Bishop Ronald nga si Leslie L. Laborada. Matod pa niya, dako nilang kalipay ug garbo alang sa ilang kuya, apan mas labaw nga malipayon ang ilang lola nga anaa na sa laing kalibutan. Tungod kay mao kini ang nagdasig ug nag-umol aron mahimo siya nga Obispo.

Paghangyo na lamang niya sa iyang kuya nga magpadayon sa pagkabuotan, pagkamaayong magbalantay ug maayong alagad sa Ginoo. Gihangyo usab niya ang bag-ong Obispo nga mag-amping kanunay, aron makapadayon siya sa iyang pagsilbi ngadto sa katawhan sa Dios.

Samtang kalipay usab ang makita sa panagway sa amahan ni Bishop Lunas nga si Rodolfo Lunas, diin mipadayag usab sa iyang kalipay sa dihang ato siyang nahinabi kinsa mibutyag nga padayon niya kining itugyan sa Ginoo. “Nalipay ko, tungod sa pari pa siya akoa na siyang gitugyan sa Labawngmakagagahom,” dugang ni Rodulfo Lunas.

Niadtong ordinasyon ni Bishop Lunas Pebrero 11, 2019 wala gayod pakyasa sa iyang tibuok banay ug mga kasilinganan gikan sa Bala, Magsaysay, Davao del Sur ang pagtambong sa okasyon. (Vanessa Franca | SUGID SoCCom)