Naghiusa, Katoliko ug dili Katoliko panahon sa kamatayon

“Hugpong sa makanunayong pagpakabana.”

Kini ang tema sa 19th General Assembly sa NHA Mortuary Homeowners Association; January 27, 2019 sugod sa alas dose (12:00) sa udto hangtod sa alas siete (7:00) sa gabii.

Nagkatapok ang sobra 500 ka mga miembro niini nga gilangkuban sa mga Katoliko ug dili Katoliko.

Makalipay tan-awon nga bisan dili sila Katoliko nitambong gihapon sila sa gihimong “Kasaulogan sa Pulong” (KSP) nga gi-sponsor sa mga GKK Servant Leaders (GSL) sa GKK Sta. Cruz.

Ang respeto anaa gyud sa ilang mga kasingkasing tungod kay dili man compulsory nga motambong sila sa KSP sama ra pod nga sa matag higayon nga adunay patay aduna may option nga magpaserbisyo o dili ang usa ka Muslim o dili Katoliko nga member.

Kung magpa KSP sa patay sila, andam ang mga GSL ug mga kaubang members nga moattend sa kada gabii nga vigil except lang kung ang haya atua sa lain o layong dapit pero kasagaran niini kadtong mga associate members na lang (mga member nga wala nagpuyo sa NHA pero gipamember sa ilang mga anak nga nagpuyo sa NHA – kasagaran mga ginikanan namo). Makahilak pud diay ka mag-tan-aw sa mga pamilya nga namatyan last year tungod kay panahon sa “PAGHALAD” apil sila nga mohalad og bulak ug kandila alang sa ilang mga namatay nga miembro sa pamilya.

Makapamalandong sad ka nga kitang tawo og sa kanta pa “here today and gone tomorrow” mao nga dapat “mangamdan gayud kita sa atong kamatayon” matod pa sa pagpaambit sa among PSL Peter Cabahug Jr.

Nalipay usab ang mga nanambong kay adunay mga kandidato nga nangadto aron mo-observe sa maong kalihukan. Isip pasalamat tungod kay ang among sound system sponsored man sa incumbent Councillor sa Davao, amo usab siya gitagaan ug higayon nga makahatag og mensahe kanamo lakip na sad ang uban pang mga nangabot.

Malampuson ang nisunod nga business matters ug election of officers for 2019 diin ang mga daang opisyales lang gihapon ang nidaog pero adunay mga bag-ong assistants nga napili usab sa panahon na adunay panginahanglan sa pag-assist in case of emergency. Congratulations sa among 19 years na nga Chairman, Carmelito Padonia.

Raffle draw usa sab ka-awaited nga bahin kada tuig tungod kay murag nabawi lang nimo ang imong registration ug annual dues nga gibayran kung maswertehan ka ug bunot kay adunay groceries, mga payong, t-shirts, mga dishwashing liquid nga IGP sa among mga women’s ug cash with calendars ug paypay pa gyud.

Daghan ang nakadawat ug nalipay labina tong adunay mga associate members tungod kay karong tuiga giapil sila sa raffle bisan wala sila nakatambong kay giuyonan man sa mga nanambong (murag pinaskuhan na lang pod sa mga ginikanan).

Kauban sa among mga sponsors, working committee sama sa ways and means, program and invitation, stage decoration, snacks and food, hall preparation, restoration, election committee gikan zone 1 hangtod zone 7 ug kaming mga emcee Marieta Comighud and Erlinda Eguia–mga mortuary members usab nagpasalamat og dako sa kalampusan sa maong 19th General Assembly. Salamat Lord! (Marieta Comighud | OMPH SoCCom)