Mga PSL sa San Pedro Katedral nag-“Balik-Lantaw” aron ma-andam sa mga hagit

Karong Pebrero 10, 2019 mao ang eskedyul sa tanang Ministriya sa GKK nga magtapok pinaagi ug sulod sa Santos nga Misa aron sa pagbag-o sa ilang mga panaad didto sa Ginoo ug diha sa katawhan isip piniyalan ug lumilihok sa Gagmayng Kristohanong Katilingban (GKK).

Pinangulohan ni Fr. Voltaire Dimol, inubanan sa mga GKK Coordinators, nagpahitabo og usa ka “Balik-Lantaw or Recollection” niadtong January 26, 2019 alang sa tanang mga Pangulo sa Liturhiya. Pagbalik-lantaw sa mga nabuhat diha sa katilingban ug sa ilang tagsa-tagsa ka kaugalingon aron ma-andam sa mga hagit diha pagkapangulo. Kini gipahitabo sa Charles Borromeo Rereat House, Matina Aplaya, Davao City, sa katuyuan nga:

• sa maong panagtigum, ang mga Pangulo sa Liturhiya, makabuhat/makabaton og kahibalo diha sa pagsangyaw sa Pulong sa Dios isip mga piniyalan;
• maka-amgo sa responsibilidad ug masinati ang grasya ug gugma sa Dios diha sa pagpangalagad nga mapa-ubsanon sa katawhan dinha sa katilingban; ug
• mahatagan og dugang kahulugan ang mga buluhaton nga adunay kalambigitan sa nabag-ong simbahan ug aktibong partisipasyon diha sa misyon ni Kristo sa iyang pagkahari, pagkapari, ug pagkapropeta.

Nahuman ang maong seminar pinaagi sa usa ka Santos nga Misa ni Fr. Voltaire Dimol. Nanguli ang mga partisipante nga malipayon, bitbit ang dugang kahibalo ug grasya sa Dios. (Rosalinda C. Jabonillo | SPC SoCCom)