Lahi ra gyud

Ikapito nga Domingo sa Ordinaryong Panahon
1 Sam. 26:2, 7-9, 12-13, 22-23 / Sal. 103 / 1 Cor. 15:45-49 / Lk. 6:27-38

Kinsa ba ang kasagaran dali nimong ayuhon sa pagtagad? Kinsa ba ang mapasalamatan dayon nimo? Kinsa ang ganahan nimong ikauban o ikaestorya? Kinsa ba ang imong ginadapit kung ikaw magkombira? Dili ba sayon kini himuon ngadto sa mga tawong imong suod ug higala gayod? Dili ba lisud man tagdon, imbitahon, ikauban o pasalamatan ang imong mga kaaway?

Sa Ebanghelyo, ang pag-awhag ni Hesus nga higugmaon ang mga kaaway nagpasabot kanato nga ang gugma diay dili lamang pagbati. Ang gugma dili emosyon nga nag-agad kung ganahan ta, kondili ang gugma diay usa ka pagpili o pagdesisyon. Taliwala sa masakit nga kasinatian, sa pagluib, sa pagsalikway, sa kakulangan sa isigkaingon, ang tinuod nga paghigugma dili maluya. Modaug ang gugma batok sa kadautan, molabaw ang gugma batok sa kahuyang. Dili magkwenta ang gugma sama sa kanunay nga pagdawat sa usa ka amahan sa mausikon niyang anak, sa pag-atiman sa Samaritano sa usa ka biktima nga gitulis diha sa dalan, ug sama sa magbalantay nga mangita sa nawala nga karnero. Kining tanan gihingpit ni Hesus diha sa krus, ang pagpadayag sa walay puas nga gugma sa Dios.

Ang unang pagbasa nagpalig-on kanato sa pagtoo nga bisan kita moatubang sa peligro, ang Ginoo moluwas gayod kanato. Dili kita maunsa uban ug diha kaniya. Kita hingpiton sa ikaduhang Adan nga mao si Kristo kinsa maoy naghatag kanato sa makabuhi nga espiritu. Isip linalang, diha kaniya kita mabag-o alang sa langitnong kinabuhi bisan ania pa kita sa kalibutan. Kini mahitabo kung maamguhan nato nga kita gipangga, gigasahan ug gigamhan sa maong espiritu nga tinubdan sa gugma ni Kristo.

Sama kang Kristo, ang Dios nga nahimong tawo, madawat unta nato ang kadtong mga dili angay higugmaon. Uban sa grasya sa Dios, unta atong matagad sa tinuoray gayod ang mga tawo nga lisud dawaton. Kay matod pa ni Kristo, kung higugmaon lamang nato kadtong makabalos kanato, wala kitay kalainan sa mga tawong dautan. Hinumdomi, ang pagkasumusunod ni Kristo lahi ra gyud.