Kapistahan sa Birhen sa Lourdes napahigayon

Tungod sa bagyo nga nasinatian sa Gagmay’ng Kristohanong Katilingban (GKK) Birhen sa Lourdes sa Purok 13, NCCC Relocation, Tigatto, Buhangin sa niaging tuig, wala pa mahuman ang pag-repair sa ilang kapilya apan kini dili babag sa pagsaulog sa mga GKK Servant Leaders (GSL) ug miembro sa katilingban sa kapistahan sa Birhen sa Lourdes niining kasamtangang tuig. Isip pagpangandam sa kapistahan sa Mahal nga Birhen, nagtinabangay ang mga GSL ug miembro sa katilingban pinaagi sa paghalad sa ilang mga grasya nga material ug sa pag-ayo sa kapilya pinaagi sa pagbayanihan.

Aron ihalad ug mapanalanginan sa Ginoo ang mga plano sa mga GSL ug miembro sa katilingban alang sa kapistahan sa Mahal nga Birhen sa Lourdes, adunay pre-fiesta assembly mass nga gipahigayon niadtong Enero 18, 2019, pagkahuman sa Santos nga Misa adunay assembliya nga gihimo aron kini mapresentar sa Pangulo Sa Katilingban (PSK) ang mga Plano diha sa mga miembro sa katilingban nga nagkatigom nga nahisakop sa Birhen sa Lourdes, NCCC Relocation ug sa kura paroko, Fr. Dionisio Tabiliran kauban ang pastoral team. Nakalatid ang mga actividades sama sa pagrosaryo, novena ug hiniusang pag-ampo, prosisyon ug mga dula sama sa basketball. Nalipay ang mga GSL tungod sa pagtambong sa mga batan-on panahon sa novena ug hiniusang pag-ampo nga gipahigayon sa siyam ka gabii.

Gisaulog ang ika-44 ka kapistahan sa Mahal nga Birhen sa Lourdes niadtong Pebrero 11, 2019 nga adunay tema nga nagkanayon: “Ang kabatan-onan nga nagsinabtanay, naghinigugmaay ug nagpamahiubsanon dalan sa kalamboan sa pagpangalagad.” Ang Santos nga Misa gipangulohan ni Rev. Fr. Dionisio C. Tabiliran, ang kura paroko sa St. Mary of the Perpetual Rosary Parish ug inabagan ni Seminarian Marlon Requitillo gikan sa Diocese of Mati diin ani-a siya tungod sa parish exposure program sa REMASE.

Bisan pa sa mga kakulian nga nasinatian sa katilingban, malipayon ang tanan tungod sa pagmahal ug debosyon sa Mahal nga Birhen kini nagmalampuson ang pagsaulog sa kapistahan sa Birhen sa Lourdes ug pinaagi sa pagtinabangay sa mga nagkalain-laing pangulo sa matag ministriya inubanan sa suporta sa mga miembro diin nagkahiusa ang matag usa sa pagpartisipar sa mga actividades nga gipahigayon. (Hermie Mapute | SMPRP SoCCom)