Hugot nga seguridad gipatuman sa parokya sa Panacan

Wala nakababag ang hulga sa kalinaw ug seguridad sa mga Parokyano sa San Miguel Parish-Panacan aron sa pagsimba sa adlaw’ng Dominggo. Kagahapong adlawa Pebrero 03, 2019 mao ang unang Dominggo diin gipatuman ang mando sa halangdong Arsobispo sa dakbayan sa Dabaw nga si Arsobispo Romulo G. Vales, DD. Nagpakanaog og Circular Letter No. 03 niadtong Enero 29, 2019 aron pagpahibalo sa tanang katoliko nga mosimba dili tugotan magdala og mga bag, backpacks, knapsack, karton sa sulod sa simbahan panahon sa Misa. Ang gagmay’ng butang sama sa pitaka mao lamang ang gitugutan madala sulod sa simbahan.

Pebrero 02, 2019 sa alas diyes (10:00 am) sa buntag nagpatawag og meeting si Kagawad Eller Bantugan PDART Coordinator sa SMP nga gitambungan sa mga opisyal gikan sa Sasa DCPO, Barangay Police, KARANCHO ug Knights of Columbus. Ang maong meeting gihimo aron sa pagplano ug pag-implementar og mga balaod aron maprotektahan ang mga parokyano sa sulod sa simbahan. Nauyunan sa maong grupo ang pagdili pagtugot sa pagpasulod ug pagparking sa mga sakyanan sa sulod sa Parish ground, pagkapkap ug pag-inspection sa mga bag sa entrance gate, ang pag-off sa mga cellphone sa sulod sa simbahan, ug pagbilin sa mga dagkong bag sa baggage counter. Nahimong nagmalampuson ang implementasyon ug hapsay kini. Sumala pa ni Raul Zamora usa sa parokyano nindot ang gipatuman nga balaod kay gibati nya nga safe gayud sa sulod simbahan.

Ang kura paroko nga si Fr. Edsel Paloma nalipay sa kaabtik ug sa dakong tabang sa grupo gikan sa Sasa DCPO, Barangay Police, KARANCHO ug sa Knights of Columbus ingon man sa PDART sa pagpatuman sa kalinaw sa parokya. Ug siya nanghinaot nga ang tanan mosimba/parokyano makasabot ug mutuman sa gimando nga balaod tungod ug alang sa seguridad ug kalinaw sa tanan. (Liz Gilbuena | SMP Parish SoCCom)