8th Parochial Fiesta, Virgen de los Remedios Parish

Alas 3 sa kadlawon sa Pebrero 2 adlaw’ng Sabado gisugdan ang pagsaulog sa kapistahan sa Virgen de los Remedios sa usa ka prosesyon sa tanang imahe nga patron sa mga GKK nga gikan sa distrito 1 ug 2 nga sakop sa VDLR. Gisundan kini sa Santos nga Misa sa alas 5 sa buntag nga gisaulog ni Padre Leif Simbajon ug sa alas 6:30 sa buntag mao si Padre William Cajes. Ang Pontifical Mass sa alas 8 sa buntag gisaulog sa atong halangdon nga Arsobispo Romulo Valles, D.D.

Matod pa sa homiliya ni Bishop Valles ang kapistahan sa VDLR mao ang balaang adlaw kung diin gihalad si Hesus ngadto sa templo. Pista sa kahayag nga mao si Hesus ug ang hagit nga mamahimo unta kitang kahayag ug maupos kita alang sa uban. Dili nato malimtan nga ang Mahal nga Birhen dako’g bida sa atong pag-ampo ngadto kang Hesus pinaagi kang Maria. Inahan sa daghang pamaagi, Inahan sa mga solusyon. Sa katapusan ang gipaambit ni Bishop Valles mao nga ang bag-o unta kada pista dili external nga bag-o kung dili mao ang renewal faith nga diha kang Hesus presentable kita ngadto sa Ginoo. Aduna kitay nawong ikaatubang, nga bisan sa kangitngit sa kalibutan kita mamahimong kahayag sa uban ug kanunay sa kalisod kita mahunghungan ni Maria nga KAYA. “Basta buhata ang Iyang gisugo kaninyo”.

Pagkahuman sa Pontifical Mass gisunod ang mga parlor games sama sa pokpok palayok, palosebo, sack race, dakop baktin ug uban pa. Aduna pay duha ka misa sa alas 3 sa hapon ug alas 4:15 sa hapon. Daghang nalipay ug nagsaulog sa ikawalo ka tuig nga kapistahan sa Virgen de los Remedios. (Lilibeth Sancover | VDLR SoCCom)