MMC Youth Leaders nagpatigayon og pinasahing pagpanaygon

Nahikurat ang mga tagbalay sa gihimo nga Christmas Caroling sa mga youth leaders sa Mary Mediatrix Cathedral (MMC) niadtong Disyembre 26, 2018 didto sa Sto. Rosario Ruparan, Digos City.

Gipili sa mga kabatan-onan ang mga tagbalay nga nakasinati og tumang kalisod ilabina sa pinansyal, tungod niini gidid-an sila sa pagpanaygon. Apan tungod sa pagpamugos, miuyon na lamang ang mga pobreng tagbalay.

Sa ilang pagpanaygon gisugat sila sa mga dagkong ngisi ug hagakhak tungod sa ilang gihalad nga pinasahing caroling nga mao ang pagkanta inubanan og hugyaw nga pagsayaw ug gisurpresa pa gayod nila ang mga tagbalay tungod, inay sila ang hatagan, sila nanghatag og mga ginagmay apan kinasing-kasing nga mga gasa nga gikan gayod sa ilang kaugalingong bulsa sama sa bugas, canned goods, noodles, kape ug uban pa. Tungod niini, tumang kalipay ang gibati sa mga nakadawat.

Ang maong kalihokan wala lamang nakapalipay sa mga gipanaygonan, nakapalipay usab kini sa mga batan-on. Matod pa ni Jhia Mae Omboy, youth leader sa Zone 9, GKK San Roque Human, Bonifacio Bataan St. Aplaya, Digos City, nga dako iyang kalipay tungod usab sa kasadya nga iyang nakita sa mga mata sa ilang gipanaygonan, “lipay kaayo ko ilabina nakita nako ang mga ngisi sa mga tawo bisan pag luoy ilang kahimtang sa ilang kinabuhi. Lami kaayo tan-awon na grabe nilang lipaya sa among pagpanaygon bisan pag walay praktis”.

Mao gihapon ang pagbati ang gipadayag ni John Jay Kim Natad, taga Zone 8, GKK Sr. Sto. Niño Ravina, Lopez Jaena Ext., Digos City, “nalingaw ko ug nalipay tungod dili lang ang mga talent sa mga batan-on ang gi-share apil na pod ang ilang mga blessings”.

Samtang dakong pangamuyo sa mga kabataan nga ma-subli pa ang maong aktibidad sa mga mosunod nga katuigan. (Sem. Rayjohn Doblas)