GKK Sagrada Familia Estores: 46 years fiesta celebration

Dakong pasalamat ug kalipay sa mga katawhan sa Sagrada Familia Estores sa malampusong pagsaulog sa ika-46 ka tuig nga kapistahan sa milabay nga Desyembre 31, 2018. Gisugdan ang Misa sa alas 10:00 sa buntag ug ang Mass Presider mao ang Kura Paruko nga si Fr. Edsel Paloma, gipasabot sa homily ni Fr. Edsel ang kaimportante sa respeto ug gugma sa mga anak diha sa ilang mga ginikanan. Ang GKK Sagrada Familia Estores usa sa 52 ka GKK sa San Miguel Parish-Panacan diin ang mga Pangulo aktibo kaayo sa sulod sa GKK hangtod sa parokya. Ang Sagrada Familia mao kini ang debosyon sa pamilyang Estores kanhing tag-iya sa yuta nga karon gipapag iyahan sa mga residente. Ug kini gipadayon hangtod karon panahona.

Adunay daghan nga mga kalihukan nga gihimo sa bulan sa kapistahan sama sa novena matag gabii sa sulod sa 9 ka adlaw una maabot ang adlaw sa kapistahan, pa-disco sa mga batan-on ug gabas night o panagtapok sa tanang residente sa Estores nga gipangulohan sa civic organisation. Aduna usab basketball nga gipahigayon. Ang grupo ni Fr. Edsel nagdula usab og basketball, sa alas kuatro sa hapon sa susamang higayon. Gikalipay gayud sa nga katawhan ang pagtan-aw sa kamaayo modula og basketball ang kura paroko. Human pagkagabii nagpahigayon usab og Search for Macho Gay ug slow drag race ang mga batan-on. Ang pangulo sa katilingban nga si Linda Masicampo nagpasalamat sa katawhan sa Estores sa pagsuporta sa mga kalihukan ilabina sa Hermano ug Hermana Mayor nga sila Mr. & Mrs. Danilo Gilbuena sa pagsuporta sa mga proyekto ug kalambuan sa kapilya. (Maria Leizl Gilbuena | SMP SoCCom)