Gasa sa bunyag: Hapit sa saktong padulngan

Is. 42:1-4, 6-7 / Sal. 29 / Buhat 10:34-38 / Lk. 3:15-16, 21-22

Dihay dayo buot mobisita sa siyudad sa Davao nagmaneho sa iyang sakyanan. Sanglit dili siya sigurado kung sakto ba ang dalan nga iyang giagian, nangutana siya sa tawong nagbaktas kung mao ba kadto ang dalan Bukidnon-Davao. Mitubag ang tawo, “Oo”. Pag-abot niya sa unahan, nagduhaduha siya, busa nangutana siya pag-usab sa laing tawo kung sakto ba ang iyang giagian. Nitubag ang tawo nga Bikidnon-Davao gayod kadtong dalana, ug sa iyang paglarga misinggit “sayop ang imong direksiyon”.

Ang pagbunyag sa atong Ginoo nagpahimangno kanato nga susihon nato dili lang kung nahasubay ba kita sa saktong dalan kondili usab sa saktong padulngan ug direksiyon sa atong panaw nga tawhanon ug espirituhanon.

Una sa tanan, angay tang magpaubos aron mahasubay kita sa hustong padulngan. Sama ni Juan nga magbubunyag, ang Ginoo nagpaubos usab nga misumite sa iyang kaugalingon aron pagpabunyag ug matuman ang gisaad sa Kasulatan. Isip mga anak magpaubos unta kita sa atong mga ginikanan. Isip mga trabahante magpaubos unta kita sa atong mga agalon. Isip mga miyembro magpaubos unta kita sa atong mga pangulo.

Ikaduha, angay natong hinumduman nga walay pinalabi ang Dios. Bisan makasasala, dawaton kita niya kung mokooperar lamang sa iyang grasya. Sama sa nadungog nato sa ikaduhang pagbasa, ilhon gayod kita sa Dios nga iyang mga anak. Gibuboan sa grasya ang mosunod Kaniya. Diha sa atong mga pagkulang isip negosyante o mag-uuma o magtutudlo, mosalig kita nga ang Ginoo nagpasaylo kanato. Diha sa atong sipyat sa paggamit sa pulong nga makapasakit ug makapabungkag, atong isalig nga kita makaamgo nga puno sa pasensiya ang Ginoo nga makapasaylo.

Ug ikatulo, mosalig kita nga sama kang Kristo, gikahimut-an kita sa Amahan. Misalig ang Dios kanato. Mao gani nga nakasalmot kita sa misyon ni Kristo sa pag-ampo, pagtudlo ug pag-alagad. Gisangunan kita sa Ginoo nga makapakaylap sa iyang kaayo ug gugma. Sa mga kaluya nato nga dala sa atong mga palpak nga nahimo, atong bag-ohon ang pagsalig nga nalipay gihapon ang Ginoo sa atong mga paningkamot nga mahingpit. Moambit unta kita sa kausaban sa katilingban aron kita moasenso. Huptan ta ang gahum sa Ginoo nga maoy maghimo natong takus sa pagdala sa kausaban.

Malipayong pagbunyag sa atong Ginoo!