Unang Misa de Gallo gidagsa sa mga tao

Gipuno sa mga manimbahay ang parokya sa Mary Mediatrix of All Grace Cathedral, Digos (MMC) abot sa ganghaan niini human gisaulog ang unang Misa de Gallo sa alas tres ug alas kwatro y medya sa kadlawon niadtong Disyembre 16, 2018.

Gipangulohan ni Bp. Guillermo Afable, DD ang unang misa sa alas tres nga adunay kapin libo nga manimbahay ug sa alas kwatro y medya sad, gipangulohan kini ni Fr. Jade Calumpong, DCD ug gikonselebrahan ni Fr. Nathaniel Ybañez, OSB nga adunay sobra libo nga mga nanimba.

“Feeling blessed kaayo ko ka nakasimba ug naka-serve ko sa choir sa unang misa de gallo agi’g pagpangandam sa pag-abot sa atong manluluwas ug Ginoo, Hesukristo,” ingon ni Rayjohn Doblas, usa ka seminarista sa Diyosesis sa Digos.

Matod pa kay Jose Ibis, “nalipay ko kay nakamata ko og sayo ug naka-serve diha sa simbahan, blessed sad kaayo ko kauban akoang mga kaubanan sa Lourdes.”

Dugang pa ni Rene Galilea, usa ka LML, “overwhelmed kaayo ko kay very successful ang unang misa de gallo, bisan pa may adunay kakulangan gamay, pero manageable ra man siya.”

Ingon sad ni Sr. Bonafe T. Agawin, SJBP, “si Kristo mihatag sa iyahang kaugalingon alang kanato, angay ra jud nato siyang pasalamatan ug daygon kay pinaagi sa pagsaulog sa misa de gallo, andam na kitang modawat sa iyahang pag-abot.”

Aduna sa’y pagbendisyon sa mga kabatan-onan nga nahitabo human gilunsad ang tuig sa mga kabatan-onan diha sulod sa santos nga misa pinaagi sa pagsayaw sa NCYM theme, “called and chosen.”

Apan pahimangno ni Sr. Evangeline V. Dolores, SJBP, aron tunhay ang aton kalipay sa pagsaulog sa Iyang adlaw’ng natawhan, ato kining pangandaman pinaagi sa pagtambong sa Misa de Gallo nga matinud-anon ug himoon kining oportunidad na andamon ang isig-kaugalingon para sa dakong selebrasyon sa pagbalik sa atong Manluluwas ug Ginoo, Hesukristo. (Jun-Jun Sampaga | SUGID)