Tuig sa mga kabatan-onan, gilunsad panahon sa unang misa de gallo

Malampuson nga gilunsad ang Tuig sa mga Kabatan-onan sa Mary Mediatrix of All Grace Cathedral, Digos (MMC) sulod sa unang misa de gallo sa alas kwatro y medya sa kadlawon niadtong Disyembre 16, 2018 pagkahuman sa homiliya ni Fr. Jade Calumpong pinaagi sa pagsayaw sa NCYM Theme, “Called and Chosen” diha sulod sa simbahan.

Gikahiusahan kini sa nagkadaiya-iyang organisasyon sa mga kabatan-onan sa parokya: Youth for Christ (YFC), altar servers, Diocesan seminarians, Lourdes, Holy Cross Academy, Inc. Digos, Cor Jesu College Digos ug mga kabatan-onan sa GKK nga gipangulohan sa Parish Youth Coordinating Council (PYCC) officers ug Zone Youth Coordinators.

Matod pa kay Rezly Florentino, PYCC president, “kini dili mahimong successful kung wala ang suporta sa among mga kaparian diri sa cathedral, kay Fr. Frederick S. Parantar, DCD, Fr. Juodito O. Tampon, DCD, Fr. Jade Calumpong, DCD, ug kang Bp. Guillermo D. Afable, DD.”

“Nalipay ug nasadya ko kay nasurprise ko sa pag-abli sa amoang katuigan isip mga batan-on sa simbahan, ug ako jung nabati ang pag-launch niini,” ingon ni Christian Dave Yanez.

Dungag pa ni Melon Quilojano, usa ka youth usherette nga dako kaayo ang iyang kalipay sa paglunsad sa tuig sa mga kabatan-onan pero dapat unta ang mga kabatan-onan musimba diha sa simbahan nga matinud-anon sa kanunay.

Apan sa homiliya ni Fr. Calumpong, iyang gihatagan og usa ka tigmo ang mga nanimba pinaagi sa usa ka pangutana, “basin kitang mga kahamtongan ug kaparian ang hinungdan sa pagkaluya sa kabatan-onan diha sa simbahan?”

Pero ingon pa ni Mayonito Patricio, usa ka hamtong nga lider sa Tuburan Community, “dako kaayo’g katungdanan ang mga hamtong sa pagbuo sa mga kabatan-onan ilabina sa ilang espirituhanong aspeto kay ang kaalam sa mga hamtong mao ang kusog sa mga batan-on ug ang kusog sa mga batan-on, mao ang kalipay sa mga hamtong.”

Sa kinalasan, ang tambag ni Fr. Nathaniel Ybañez, OSB sa tanang mga kabatan-onan nga mahimong sinsero diha sa ilahang kinabuhi ug gamiton ang social media para sa paghatag og ebanghelisasyon sa uban pang mga kabatan-onan. (Junjun Sampaga | SUGID)