San Isidro Labrador Parish sa Catalunan Grande, nagpasiugda og GSL Orientation, Formation and Fellowship Day

Sugod niadtong Agosto karong tuiga hangtod sa ulahing semana sa Oktubre, nagpahigayon ang 38 ka mga Gagmayng Kristohanong Katilingban (GKK) ug Selection sa parokya sa San Isidro Labrador Parish sa Catalunan Grande.

Kini gipasiugdahan og Kasaulogan sa Eyukaristiya ni Fr. Maximo Bahinting agig pagbisita sa mga GKK ug pagpakiglambigit sa mga GSL.

Napili ang ilang mga bag-o nga GKK Servant Leaders sama sa Pangulo sa Katilingban (PSK), Pangulo sa Panudlo (PSP), Pangulo sa Kristohanong Banay (PSKB), Pangulo sa Batan-on (PSB), Secretary/Social Communication In-Charge, ug Finance/Treasurer.

Sa mga bag-ong napili, adunay kabalaka, labi na sa mga bag-o pa lang nag-alagad sa ilang GKK, kung ila ba gayud mahimo ang mga responsibilidad sa ilang bag-ong misyon.

Isip tubag sa maong sitwasyon sa mga bag-ong napili nga mga GSLs, ug usa sa mga pagpangandam alang kanila bag-o sila mangalagad sa ilang GKK sugod Enero 2019 hangtod Disyembre 2021, nagpahigayon ang maong parokya sa unang ang-ang sa pormasyon, ug GKK Servant Leaders Orientation and Fellowship Day niadtong Nobyembre 18, 2018 sa San Isidro Labrador Parish Multi-Purpose Covered Court, uban sa tema: “GSL, KATILINGBAN SA MISYONARYONG MGA TINUN-AN.” (Evangelii Gaudium)

Adunay 561 ka mga GSLs nga mitambong sa mga aktibidades sa tibuok adlaw. Gipangulohan kini sa mga outgoing nga Pangulo sa Katilingban, giniyahan sa Kura Paroko nga si Fr. Maximo Bahinting ug Pastoral Office Coordinator Dina Caballero.

Nagsugod ang maong Orientation and Fellowship Day sa Santos nga Misa, ug sa iyang homilya, gipahinumdoman ni Fr. Max Bajinting ang mga bag-ong GSLs sa ilang mahinungdanon nga misyon sa pag-umol una sa ilang kaugalingon isip GSL aron sila makatabang usab sa ilang mga kaubanan sa ilang katilingban.

Gisundan dayon kini sa Orientation matag ministriya nga gipangulohan sa mga lain-laing Core Group Facilitators ang mga outgoing PSK sa parokya. Sa maong panagtigom, gi-review ang SILP Vision-Mission–Goals, gipalawom ang ka-importante sa GKK ug ang ilang mga roles ug functions isip bag-ong napili nga GSL.

Kini nagtabang kanila sa pagpaklaro sa pastoral direksiyon sa parokya ug pagwagtang sa ilang kabalaka nga kung ila bang mahimo ang ilang mga tahas sa ilang bag-ong ministriya.

Nag-uban-uban ang mga GSLs matag Zone panahon sa Fellowship Lunch diha sa Multi-Purpose Covered Court.

Adunay lima ka sona ang maong parokya. Pagka-hapon na, nagtigom na sila matag sona aron mapasabot ang mga katungdanan ug tahas sa mga Zone Coordinators matag ministriya.

Gipahigayon dayon ang pagpili sa mga Zone Coordinators ug pagplano sa ilang mga programa sa matag sona. Natapos ang maong panagtigom sa usa ka Closing Liturgy ug malipayon nga gi-abi-abi ang mga bag-ong GSLs sa maong parokya, ug gidasig nga magmabungahon sa ilang pag-alagad sa Ginoo pinaagi sa ilang tagsa-tagsa ka GKK. (Jimmy Jesuro)