Pamilya Tabangonon?

Feast of the Holy Family of Jesus, Mary & Joseph
Sir 3:2-7, 12-14 / Ps 128:1-2, 3, 4-5 / Col 3:12-21 / Lk 2:41-52

Kinsa may midawat, nanalipod, nag-amuma, nag-alima ug nagpadayon paghulma kang Jesus aron makabuhat siya sa iyang misyon? Ang Sagrada Pamilya. Sila ang midawat kaniya sukad pa sa iyang pagpakatawo; Sila mao ang seguridad ni Jesus. Sila ang nagpaneguro nga matuman ang saad sa Dios diha kaniya.

Ang basahon sa Ebanghelyo niining piyesta sa Sagrada Pamilya nagpadayag sa hulga batok sa kinabuhi sa batang Jesus ug sa pagpanalipod nga gihimo sa Sagrada Pamilya alang sa iyang kinabuhi. Gihulga ang pamilya, pinaagi sa damgo, nga ang hari Herodes naglaraw pagpatay sa batang Jesus. Busa misunod si Jose sa tambag sa anghel ug iyang gidala ang bata ug ang iyang inahan didto sa Ehipto diin sila nagpuyo hangtud nga namatay si Herodes.

Ang Sagrada Pamilya maoy nanalipod sa bata nga manluluwas sa kalibutan gikan sa hulga batok sa iyang kinabuhi. Human masulbad ang problema sa hulga, mibalik ang pamilya ngadto sa Israel, ug mipuyo sa Nazaret diin si Jesus mitubo ug milambo ang salabutan, nahimong hingkod ug napuno sa grasya. Dinhi atong makit-an ang nagpadayon nga papel sa Sagrada Pamilya sa kinabuhi ni Jesus, diin sila nag-amoma ug naghulma kaniya agi’g pagpangandam sa iyang misyon.

Ingon usab niini kamahinungdanon ang papel sa atong mga pamilya aron mabuhi ug mahimong tawo nga adunay makahuluganong katuyoan sa kinabuhi ang matag anak nga gipakatawo ning kalibutan. Kung wala ang suporta sa pamilya, dili gayud nato makita ang katumanan sa atong kaugmaon ug sa tawag sa kinabuhi. Busa pangutan-on nato ang kaugalingon; nagpadayon pa ba ka–epektibo ang atong pamilya sa iyang tahas sa pag-alima –paghulma ngadto sa pagka-responsable nga mga tawo.

Sa atong panahon karon, daghan ang mga hulga nga giatubang sa atong mga pamliya. Sama sa panagbulag kon divorce, “single parenting”, irresponsableng mga ginikanan, ipon- ipon, nabungkag ng mga pamilya tungod sa kapit-os ug pagpangita’g kuwarta sa gawas sa nasud, mga anak nga nabilin sa lolo og lola diin giabusar sa mga tiyo o tiya kay layo ang mga bata sa ginikanan ug uban pa. Unsay kaugmaon sa mga kabataan karon kung magpadayon ang pagkahuyang sa atong mga pamilya. Asa sila modangop aron mapanalipdan ang ilang kinabuhi? Kinsay makapaneguro nga sila mahulma, maamoma ug molambo sa salabutan, mohingkod ug mapuno sa grasya?

Daku kaayo ang kawad-on sa atong katilingban ug sa nasud kung wala kitay himoon alang sa pagpalig-on sa atong mga pamilya. Kining pagsaulog sa Piyesta sa Sagrada Pamilya usa ka pagpahigmata alang sa mga Kristyano diin si Cristo ang nakasentro, sa paghiusa aron sa pag-atubang sa mga hulga sa atong mga pamilya. Busa man gani ang atong Santo Papa Francisco nag-awhag sa tanang pangulo ug sakop sa Simbahan sa pagpamalandong sa kabilihon sa kaminyoon ug pamilya ug sa pag-atubang sa komplikadong mga pastoral nga kahimtang sa pamilya. Ang mga Kristyanong mga bili kinahanglan nga molambo diha sa pamilya. “Busa pag-sapot kamo sa kasingkasing nga maloloy-on, mapaubsanon, maaghop ug mapailobon. Pagpailobay kamo ug pagpinasayloay” (Col 3:12-13), giingon ni San Pablo ngadto sa mga Kristyanos sa Colosas.

Mga ginikanan, tahura ang inyong mga anak: dali ra nga tapakan ang gisi nga sapot, apan kon makabungat kita ug sakit nga mga pulong, ngadto kanila, ang samad nga anaa sa inyong mga anak hapit dili maalim. Walay pamilya nga dili moagi og mga kalisod ug pagpaningkamot sa kinabuhi. Ang pagmatuto sa mga anak, ilabi na karong panahona, malisod usab. Apan kon buhaton nato ang gisugyot ni San Pablo, kita magmalaumon: “…Ug labaw niining tanan idugang ang paghigugma nga maoy nagbugkos sa tanan ngadto sa hingpit nga panaghiusa. Paharia sa inyong mga kasingkasing ang pakigdait nga gikan kang Cristo kay alang niini, gitawag kamo sa Dios aron mahiusa kamo diha sa usa ka lawas. Ug magmapasalamaton kamo… Pagtinudloay ug pagpahimangnoay kamo uban sa tanang kaalam. Pag-awit kamog mga Salmo… ug awiti ninyo ang Dios uban sa pasalamat diha sa inyong mga kasingkasing… (Col 3:14-16) Malipayong pagsaulog sa Piyesta sa Sagrada Pamilya! (Sr. Rica Dalaguit, FsP)