Pag-ampo sa Rosaryo gi-awhag sa Obispo alang sa Magtutuo

Niadtong Disyembre Sais 2018 gi-awhag sa Obispo sa Diocese sa Digos nga si Bishop Guillermo Afable, DD ang mga magtutuo atol sa Kapistahan sa San Francisco Javier Kelegbeg Mission Station sa Barangay San Antonio, Santa Maria, Davao Occidental nga ipakaylap ang pulong sa Dios ngadto sa uban sama sa gihimo sa patron nga nahimo kining magsasangyaw.

Sumala sa Obispo nga mamahimo sila nga magsangyaw ni Kristo pinaagi na diha sa pag-ampo sa Santos nga Rosaryo, tungod sumala pa nga anaa na tanan sa Rosaryo ang mga kinabuhi ni Kristo ilabina sa matag misteryo niini.

Dugang ni Bishop Afable nga mas maayo nga himoon ang pag-ampo sa Rosaryo pinaagi sa paggamit sa ila mismo nga pinulungan nga Tagakaulo aron ilang mas masabtan kon unsa man ang unod niini.

Samtang nahibaloan nga naabot ang Kristianismo sa maong lugar niadtong dekada 80 tungod sa pagsangyaw sa Canadian nga Misyonero nga si Rev. Fr. Gil Bilanger, PME kinsa mao usab ang nagsangyaw sa Malita Tagakaulo Mission Station sa Demoloc Malita, Davao Occidental.

Samtang niadto usab nga Disyembre 08 niining tuig atol sa ika-63 nga kapistahan sa Immaculate Conception Parish, Bansalan, Davao del Sur, si Bishop Afable nag-awhag sa mga parokyano nga himoon ang matarong ug dili unta madani sa dautan.