Mga Piniyalan Naglihok sa ICC GKK

Ning ikawalo ka tuig sukad nga gilusad sa Ascension of the Lord Parish ang Spirituality of Stewardship as a Way of Life, nakab-ot sa Immaculate Conception Chapel sa Matina Gravahan ang kalampusan ug pasidungog isip usa sa mga nag-unang katilingban nga mitubo dili lamang sa gidaghanon apan lakip usab sa pagpadayag sa kaakuhan pinaagi sa pagpa-ambit matag bulan sa mga grocery items alang sa mga indigents nga tindahan sa parokya.

Apan ang labing dako nga kalampusan nga naangkon sa ICC GKK mao ang pagkahuman sa gitukod nga kapilya gikan sa kanhi gi-anay nga estruktura ngadto sa dos andanas nga gambalay.

Atol sa ika-55 nga kapistahan nga misa nga gipangulohan ni Rev. Fr. Zenon Ampong, kura paroko sa Ascension of the Lord Parish, gidasig niya ang katawhan sa pagpadayon sa paglambo.

Gisaysay usab sa Pangulo sa Katilingban nga si Jimmy Libres nga nahitabo siya sa dihang nagmisa atol sa pista si kanhi kura paroko Rev. Fr. Leonardo Dublan, Jr. niadtong tuig 2016. Nanggawas ang mga ibos atol sa iyang homiliya sa alas 4:30 sa kaadlawon nga misa.

“Alang kanako usa na kadto ka sign nga gikinahanglan na nga maghimo ug lakang aron nga ilisan na ang estruktura sa daang kapilya,” si Libres namahayag.

Gisugdan gilayon sa mga GSL (GKK Servant Leaders) ug mga TPB (Tigpasayon sa Pundok Banay) ang fund raising campaign.

“Sa primero daghang mga reklamo sanglit alang kanila daghan na kaayo ug amotan,” midugang si Libres.

“Apan sa kadugayan nga pagpasabot ilabina kabahin sa stewardship, sila na mismo ang moboluntaryo sa paghatag og dagkong kantidad,” si Libres nagkanayon.

Dugang pa niya nga ang lihok inubanan sa pag-ampo dako gayud ug gikatabang. Matag Huwebes nagrosaryo ang mga prayer warriors sa pag-ampo nga dunay hatagan og dakong grasya ug magpa-abot alang sa kahumanan sa kapilya. Nahitabo gayud kini busa naatopan, nasemento ang ikaduhang andana, na-tiles ang silong ug nabutangan og gate.

Base sa sugyot ni Fr. Dublan, gihimo ang ikaduhang andana alang disaster preparedness sanglit bahaonon man ang Matina Gravahan.