LCCP Commissioning held

Mapasalamaton ang Kura Paroko, Fr. Dionisio C. Tabiliran sa St. Mary of the Perpetual Rosary Parish sa pagtahan sa mga Lectors, Commentators, Choirs ug Psalmists (LCCP) sa ilang kaugalingon aron sa pagpadayon sa pag-alagad sa Simbahan.

Atol sa kasaulogan sa Santos nga Misa sa alas 5:30 sa hapon niadtong Nobyembre 18, 2018 gipresentar sa Parochial Vicar, Fr. Rey T. Sabuero ngadto sa Kura Paroko ug sa katilingban nga nagkatigom diha sa Santos nga Misa ang cincuenta y dos (52) ka nga LCCP aron sa pagpanalangin ug pagpadala kon commissioning sa ilang tagsa-tagsa ka gimbuhaton.

Ang mga LCCP nakahimo na sa gikinahanglang pormasyon sama sa seminar-workshop ug recollection diin nakita nga sila angayan ug takus sa maong pagpangalagad isip LCCP. Sa maong commissioning gidawat sa mga LCCP pinaagi pagtubag og “yes” ang kanunay nilang pagtuman diha sa ilang katungdanan.

Busa, nanghinaut ang Kura Paroko ug Parochial Vicar nga dili lamang sa pagbag-o sa ilang panaad ang mahinungdanon isip LCCP apan ang importante nga molahutay sila sa pag-alagad ngadto sa Ginoo kay pinaagi sa ilang pagbasa napadangat nila sa katawhan ang pulong sa Dios. Gipahimangnoan usab sa Kura Paroko ang mga LCCP nga unta kanunay nilang sundon ang mga nakalatid nga mga schedule.

Gihuman ang kalihukan pinaagi sa fellowship ug hamubong programa nga gipangulohan ni Bro. Rogelio Adan ug ang paghatag og certificate nila Fr. Rey T. Sabuero ug Sis. Predeswinda Alinsub, LeCComP Coordinator alang sa tanang nakatambong sa maong LCCP commissioning. (Hermie Mapute | SMPRP SoCCom)