Kura Paroko sa Indangan gi-instalar

Atol sa ika-siyam nga kapistahan sa parokya sa Miraculous Medal niadtong Nobyembre 27, 2018, gi-instalar ang bag-ong kura paroko nga si Rev. Fr. Jesus Samaniego isip ikatulo nga pari nga na-assign sa maong parokya.

Sa homiliya ni Arsobispo Valles iyang gihagit ang bag-ong kura nga sa dili madugay makatukod na sa gipangandoy nga istruktura sa Simbahan. Dugang pa sa obispo nga dili kini mahimo ni Fr. Jess kung walay suporta sa mga parokyano.

Ang kura gitahasan usab sa obispo nga maoy mangulo sa mga katawhan sa pagpalambo sa espiritwal nga aspeto sa kinabuhi sa matag Kristyanong magtotoo, inubanan sa Parish Pastoral Council, Parish staff ug sa tanang GSL sa Gagmay’ng Kristohanong Katilingban.

CHANNEL OF LIFE

Gipangulohan usab sa arsobispo ang Sakramento sa Kompirma niadtong Nobyembre 29 diin 55 ka mga magtotoo ang midawat sa maong Sakramento. Kauban didto ang mga paresan nga nangandam alang sa ilang kaminyoon.

Matud pa niya nga ang Sakramento sa Kaminyoon mao ang agianan sa kinabuhi nga gihatag sa Dios alang sa tanan.

Pinaagi sa mga ginikanan, ang mga kabataan magiyahan diha sa panaw sa kinabuhi ilabina sa pagdawat sa mga Sakramento.

Iyang gipahinumdoman ang tanan nga ang Sakramento sa Kompirma ug ang uban pa maoy makahatag kanato ug kalig-on tungod sa pagbubo sa Ginoo sa iyang Balaang Espiritu Santo nga maoy nagalihok sa atong tagsa-tagsa ka kinabuhi. (Anabelle Ejercito Encluna | OLMMP SoCCom)