Kristiyano, Muslim ug Lumad nagkahiusa alang sa kalinaw ug kalamboan

Nagkahiusa ang gatusan nga mga Muslim, Lumad, ug Kristiyano sa nagkadaiyang denominasyon niadtong Dec. 1, 2018 sa Digos City National High School Gym, Digos City, Davao del Sur, alang sa Mindanao Week of Peace 2018 ingon man subay na usab sa interreligious ug interfaith dialogue inubanan sa tema “Peace Through Dialogue: Our Destiny.”

Alas sais sa buntag usa ka motorcade ang gipahigayon nga milibot sa dakbayan, gisundan sa interfaith prayer, makita sa maong panagtigom, taliwala sa nagkadaiyang pagtuo gikan sa Kristiyano, Muslim ug Lumad anaa ang paghimamat ug kalipay alang sa kalinaw.

Ang maong programa gisuportahan sa mayor sa dakbayan nga si Mayor Joseph Penas, diin mihatag sa iyang mensahe alang sa kalinaw, sumala sa mayor nga dako ang iyang pangandoy nga ang kalinaw sa dakbayan gikan sa nagkadaiyang pagtuo magpadayon ug mukaylap pa sa nagkadaiyang parte sa probinsiya ingon man nasod.

Samtang nihatag sa pagpasabot kung unsa ang Bangsamoro Organic Law si Hadji Sami Buat, ang Chief Cultural Affairs Division sa National Commission on Muslim Filipinos Region XI, diin gipaniguro ni Buat nga ang mga Kristiyano ug Lumad nga nahisakupan sa maong balaodnon, makabenepisyo usab niini ug anaa sa maayo nga kahimtang.

Samtang mibutyag si Buat nga buot niya mapadayon ang nasugdan kaniadto nga interfaith ug interreligious dialogue alang sa kalamboan.

Apan iyang giklaro nga walay bangi ang Kristiyano, Muslim ug Lumad sa dakbayan apan himuon ang interfaith ug interreligious tungod mas mapalambo pa ang kalinaw ug panaghiusa sa tanan.

Samtang ang maong kalihokan hugot bakos nga suportado ni Bishop Guillermo Afable, DD ang obispo sa Diocese sa Digos.