Katekismo alang sa mga batang wala pay first communion, gihatag diha sa sona

Gipahigayon sa sona otso sa Mary Mediatrix of All Grace Cathedral, Digos (MMC) ang paghatag og katekismo sa mga batang nag-grado og 4, 5 ug 6 nga wala pa makadawat sa sakramento sa unang kalawat gikan pa niadtong Nobyembre 10 hangtod Disyembre 29, 2018.

“Gibuhat kining katekismo aron mas mahibal-an sa mga bata ang mga misteryo sa atong pagtoo,” gipasabot ni Liza Abing, MMC head catechist.

Dugang pa niya, pinaagi aning katekismo, mas mailhan pa sa mga bata ang buhing Dios ug usab mas higugmaon nila Siya.

Sumala pa ni Nelsa Orquina, Zone 8 catechist coordinator nga dako kinig ikatabang alang sa espirituhanon nga panginahanglan sa mga kabataan.

Ang sulod sa katekismo mao ang kinabuhi ni Hesukristo gikan pa sa pagtuman ni Maria sa kabubut-on sa Dios Amahan nga gipahibalo kaniya ni Anghel Gabriel hangtod sa iyahang kamatayon ug pagkabanhaw.

Gisaysay sab didto ang mga maayong buhat ni Hesukristo nga mao ang manluluwas sa katawhan sa Dios gikan sa mga sala ug kini gipasabot sa mga bata nga ang pagdawat sa sakramento sa unang kalawat nangahulugan sa pagdawat kang Hesukristo diha sa ilahang kasing-kasing.

“Dako kaayo akong pasalamat kay gihatagan mi’g dakong pagtagad sa simbahan nga wala pa makadawat sa unang kalawat ug mas nakaila pa namo’g taman si Hesukristo,” butyag ni Mark Dhennery, partisipante sa nahisgutang katekismo.

Samtang pahinumdum sa Coordinator nga mas maayo kini kon aduna diha sa kanunay ang mga ginikanan sa mga bata aron sila sab unta makabalo sa importansya sa sakramento sa unang kalawat. (Eduardo “Jun” Sampaga Jr. | SUGID SoCCom)