Kaparian ug kamadrehan mipakita sa talento

Nalingaw ang katawhan sa Diocese sa Digos tungod sa gipakitang talento sa kaparian ug kamadrehan atol sa Culmination sa Year of The Clergy and Consecrated Persons niadtong Nov. 27, 2018 sa Cor Jesu College Gym, Digos City, Davao del Sur.

Ang maong okasyon gisaksihan sa gatusan nga mga parokyano ug mga studyante gikan sa nagkadaiyang dapit sa probinsya sa Davao del Sur ug Davao Occidental, ilabina sa presensya usab sa mga kaparian ug kamadrehan sa nagkadaiyang congregasyon nga aktibo nga miserbisyo sa Diocese. Nakurat ang kadaghanan sa mga gipakita nga gitipigang talento sa mga kaparian ug kamadrehan ilabina ang katakos sa pagkanta ug pagsayaw.

Palakpak ug singgit ang nadungog sa maong gym pagsugod pa lang sa programa, ilabina sa pagkanta na sa Bishop-Elect sa Diocese sa Pagadian nga si Bishop-Elect Ronald Lunas, gisugdan ang iyang kanta sa nag-uluhang “You Raise Me Up” ug sumala pa sa iyang komedya nga Chinese Version sa maong kanta nga Butsekik ni Yoyoy Villame, usa ka kanta nga wala masabti ang lyrics apan nalingaw ang tanan.

Apan duna pay bonus ang programa, ilabina sa sorpresa nga pakita sa katakos ni Bishop Guillermo Afable, DD sa iyang kahanas sa pagpatugtog sa ukelele.

Samtang nasayran nga ang maong aktibidad usa ka fundraising activity alang sa padayon nga renobasyon sa Mary Mediatrix Cathedral, sa Digos City, Davao del Sur.