Kabataan nangandam sa pag-abli sa Year of the Youth sa Parokya

Nag-abot ang 47 ka batan-ong lideres sa lahi-lahi nga mga GKK nga sakop sa Parokya ni San Jose ang Mamumuo ang mitambong sa gipahigayon nga Parish Youth Coordinating Council Meeting niadtong Nobyembre 24, 2018 sa ala una sa hapon didto sa ilang parokya. Kini gipangulohan sa ilang Parish Youth Leader nga si Revallin C. Dela Cruz.

Nahimong unod sa panagtapok ang paghisgot mahitungod sa mga umaabot nga kalihukan sa batan-on sa parokya sa bulan sa Disyembre. Apil niini ang pagdasig sa mga batan-on nga gamiton ang Social Media aron pagtabang og pagpakaylap mahitungod sa HIV/AIDS karong umaabot nga Disyembre 1, 2018. Nahisgutan usab ang pagpahigayon sa lokal na kasaulogan sa Adlaw sa mga Batan-on o National Youth Day karong umaabot nga Disyembre 15-16, 2018. Ug sa kadlawn sa Disyembre 16, 2018, sa panahon sa unang Misa de Gallo, pagahimoon ang paglungsad sa Tuig sa mga Batan-on o Year of the Youth isip maoy mahimong selebrasyon sa kinatibuk-ang simbahang Katoliko sa atong nasud. Nasabutan usab nga adunay mamahimong Christmas Gathering ug Year-End Evaluation sa mga nahimong kalihukan sa batan-on sa tibook tuig sa 2018.

Madasigon kaayo ug nagkahiusa gayud ang mga batan-ong lideres dinha sa pagplano sa mga kalihukan alang sa mga batan-on nga makatabang kanila aron mas molambo pa dinha sa ilang pagtoo sa Diyos, dinha sa ilang pagpangalad sa simbahan ug pagtabang sa ilang katilingban. (Vanessa V. Franca)