Duha ka GKK sa OLLP Bangkal gisaulog ang kapistahan ni Kristong Hari

Ang kapistahan ni Kristong Hari, mabulokong gisaulog niadtong Nobyembre 25, 2018 sa duha ka Gagmay’ng Kristohanong Katilingban nga nahisakop sa parokya sa Our Lady of Lourdes, Bangkal: ang Christ The King Kadayawan Homes Phase 2-District 4, ug ang Christ The King Tahimik-District 7. Matod pa sa duha ka PSK sa managlahing katilingban, “Goal Achieved.”

Sa katilingban sa Kadayawan Homes Phase 2, gisaulog ang ika-23 nga kapistahan. Usa sa mga gihatagan ug highlight ni Rev. Fr. Leonie H. Espana, OLLP Parish Priest, sa iyang homiliya sa alas 07:30 sa buntag nga misa pasalamat, mao ang pagpangalagad nga diha magsugod sa pamilya. Ang pagpangalagad sa GKK o Parokya bunga lang sa nag-overflow nga grasya sa pagserbisyo. Uban ang iyang panghinaot nga ang maghari unta sa katilingban mao ang mga hiyas sa pagkahari ni Kristo. Nga kini unta nga mga hiyas maipakita sa miyembro sa pamilya. Kabahin sa maong homiliya ang mga example ug practical tips nga ang mga nanambong naka-relate, naka-connect.

Pagkahuman sa Santos nga Misa, gawas sa traditional nga brunch fellowship nga diin si PSL Jun Ociones ang nangulo sa pag-andam ug pagluto, inubanan sa mga GSLs naghatag ug libreng gupit ug masahe si Kapitan Bendor Calamba, pinaagi sa Purok Leader, Leo Rosales. Sa pagkagabii gipahigayon ang The Kadayawan Homes Phase 2’s version sa ABS-CBN Showtime nga gi-organize sa Purok Leader ubos sa suporta sa Brgy. Captain. Nalingaw dili lang ang mga miyembro hasta usab ang mga silingan nga mga GKKs.

Sa laing bahin, matod pa ni Sis. Mila Balansag PSP sa Christ The King Tahimik, gipahitabo ang misa pasalamat sa ilang katilingban alas 05:00 sa hapon Nov. 24 bisperas sa kapistahan, diin gisaulog sa no less than our parish priest, Fr. Toto. Sa panahon sa siyam ka gabii nga novena nagpahigayon ug Pundok Banay Show Time pagkahuman ug snacks, diin gipakita sa siyam ka Pundok Banay ang ilang tagsa tagsa ka gasa sa pagsayaw. Ang parlor games sama sa palo sebo, sack race ug uban pang larong Pinoy gipahitabo sa kapistahan. Ang ika-32 nga tuig gisaulog uban ang tema nga, “Pag-alagad: Kahulugan sa Misyon sa Pagkahari.” Ug unang fiesta mass sa bag-o nga kapilya human nga gibalhin kini sa lote sa pamilya Vidamo. Dako ang pasalamat sa katilingban sa maong pamilya sa ilang pagtugot nga didto itukod ang kapilya human sila makadawat ug “notice to vacate” kay gamiton na ang luna.

Dako ang kalipay ug pasalamat ni Kadayawan Homes Phase 2, PSK Flor Angco ug Tahimik PSK Jovet Sabio, kay pinaagi sa pagtinabangay sa mga GSLs ug miyembro nahimong hapsay ang dagan ug nagmalampuson ang mga kalihokan.

Uban sa mga basic nga pagpangandam sa duha ka katilingban mao ang pagpatawag ug asembleya aron hisgutan ang mga kalihukan. Kabahin sa nahisgutan panahon sa asembleya ang “evaluation” sa mga kalihukan sa nilabay nga tuig; mga maayo nga nahitabo nga ipadayon, ug ang mga panghitabo nga nagkinahanglan nga naay himoong kausaban ug kinsay modumala sa maong kalihokan.

Gisaulog ang fiesta agi ug pasalamat ni Kristong Hari nga kanunay nagauban ug naggiya sa katilingban sa pagpanaw sa ninglabay nga tuig, uban sa mga pag-ampo sa mga grasya nga madawat sa umaabot nga mga adlaw; ug ang pagpamalandong sa tagsa tagsa nga kinabuhi nga unta masundan ug mahimong modelo ang kinabuhi ug hiyas ni Kristong Hari. (Vinny G. Bajo | OLLP SoCCom)